萌系美少女係動漫迷嘅最愛之一，而日本漫畫界就有唔少人氣作品，憑住萌味而取勝。呢類萌味作品有好多，但係若講當中最具萌味同時又兼具官能刺激嘅代表，嚟自超人氣成漫家上乃龍也嘅作品《High?×High》，正正係好此道粉絲絕對唔可以錯過嘅佳作。
有人話上乃龍也鍾情年紀大啲嘅女角色，亦即係姊系角色，但呢個講法唔正確，皆因佢其實鍾愛任何年齡層嘅美少女，只係近年因為佢本成漫作品《馬賽克×三姊妹》大熱，大家先至對佢有所誤解。如果翻查番佢初出道嘅作品，就知道其實佢曾以唔同年齡嘅美少女作為創作對象，並非對單一姊系角色有興趣。
話說回來，究竟佢對美少女有幾咁熱愛呢？只要睇下佢嘅自畫像就知道，事關佢連自畫像都係用個大眼美少女嚟代表自己，並曾因此令人誤以為佢係女人。早喺2000年初，佢以同人漫畫家身份活躍於同人界，而當時佢創作嘅類型有好多，從少年冒險漫畫到成人漫畫都有。不過由於佢筆下嘅美少女都萌爆關係，加上佢又鍾意加入鹹濕內容，故此冇耐佢就得到成人漫畫月刊嘅邀請，自此開始成人漫畫家嘅生涯，先後喺多本成漫月刊發表作品，其後以《COMIC Penguin Club》作為佢嘅主要發表媒體。
佢開初嘅成漫題材都係同女子學園有關，好似喺2005年4月推出嘅處女成漫單行本《Suginoha女學院奉仕組》，2006年9月發表嘅《放課後少女》，2007年8月推出嘅《Lewd Feeling》等，均係學園系作品。及至2008年開始，作品內容開始變得多元化，令劇情變得更加豐富，當中《High?×High》同《馬賽克×三姊妹》係佢嘅代表作。隨住人氣愈嚟愈高，佢自2010年開始向一般漫畫進軍，喺漫畫月刊《電擊魔王》上推出由人氣遊戲《聖誕之吻》改編而成、非定期連載嘅漫畫作品《聖誕之吻 Love goes on！ 七咲篇》、《聖誕之吻 Love goes on！ 森島遙篇》及《聖誕之吻 Love goes on！ 梨穗子篇》，同樣得到好評。
上乃龍也第6本推出嘅單行本《High?×High》，收錄咗自2006年至2009年期間喺成人漫畫月刊《COMIC Penguin Club》上發表嘅作品，分別有《泥醉×忠告 4C》、《泥醉×忠告》、《泥醉×制服》、《從上面看×命令語氣》、《妹妹×用心》、《妹妹×用心的續篇》、《妹妹×用心的另一面》、《姊弟×熱視線》、《meet×meet》、《清水君與坂田×我》、《麻耶×沙耶》及《爆乳×同居劇場》共12個單元故事。當時成漫評論家指呢本作品，充滿美少女嘅色氣同誘人癡態，充分展現人間色慾嘅場面，而喺眾多單元故事中，則要數《泥醉×忠告》同《麻耶×沙耶》得最多成漫迷激讚。
《泥醉×忠告》中嘅女主角OL廣美雖然比由細玩到大嘅鄰居吉人大5歲，但其實佢一直以嚟都暗戀吉人，希望有朝一日吉人能夠大膽同佢剖白。點知有一晚，吉人突然同佢講被一個女性朋友表白。逞強嘅廣美就叫吉人如果冇乜理由拒絕嘅話，不如試下同對方拍拖，只係內心卻後悔不已。自從吉人拍拖後，便經常到廣美房間分享拍拖甜蜜事，更令廣美覺得心酸。有晚吉人問廣美，如果想同女友有更進一步發展嘅話，應該要有乜嘢準備。廣美指其實唔使諗咁多，直接將對方推倒床上就得。點知話未講完，吉人就將廣美推倒，唔通吉人鍾意嘅對象竟然係廣美？
《麻耶×沙耶》中嘅麻耶同沙耶之間，擁有一種神秘嘅感應，互相可以感覺到另一方嘅任何感覺，包括性高潮！不過由於一個保守，一個開放，較開放嘅沙耶經常「引發」出麻耶嘅高潮！有晚，沙耶又帶男人返屋企曳曳，而對方竟然係麻耶暗戀多年嘅渡邊！相當難過嘅麻耶，只好期望沙耶唔好對渡邊出手。不過孤男寡女共處一室，兩人又點可能唔擦出慾火呢？莫名快感喺麻耶身上湧起，原來那邊廂渡邊已對沙耶發動強勁嘅活塞運動。就喺渡邊發射升空之際，兩人亦到達高潮！此時沙耶突然同渡邊表白，只係從渡邊嘅眼神中，暗暗反映出唔通佢所愛嘅其實係隔籬房嘅麻耶？
漫畫名稱：《High?×High》
作者：上乃龍也
出版：富士美出版
頁數：188頁
撰文：魂