天王城城豪掟兩千萬港紙，買咗全球限量32架嘅法拉利FXX K落場版，好威？梗係威，但未夠，假如佢夠薑喺車身拉埋成人網站花，咁就「宇宙最威」喇！唔係細佬葡萄呀，確實YouPorn.com隆重宣布搞個設計大賽，邀請全球網民設計獨一無二YouPorn Supercar，頭獎一名，請你去歐遊包食包住唔包女，都夠爽啦！
「Design the YouPorn Car」乜嘢嚟？好簡單，即係YouPorn有架超級跑車，畀個公司Logo你，再加一啲指定元素，然後由閣下自由發揮設計，完成作品後掟番去官方網站同其他參賽者鬥，最後由官網及網民選出優勝者，冠軍一名可以飛往倫敦、包1晚酒店連食宿，以及為勝出嘅YouPorn Supercar嘅揭幕嘉賓，並可以駕駛呢架價值$400,000英鎊（約348萬港元）超跑，但冇講明幾耐呀！單係幻想都夠威威啦！唔好以為YouPorn吹水呀，人哋發晒新聞稿，搵咗架林寶堅尼（Lamborghini）超跑Aventador，仲搵埋英國數一數二嘅超跑車身貼膜大廠Yiannimize合作，將設計圖貼喺車身上面，唔講唔知，上Yiannimize嘅官網發現原來好有朵，成立以來已為全球3,000架辣車拉花，顧客全屬名人明星，如英國人氣男子組合One Direction（1D）、已宣布掛靴嘅「魔獸」杜奧巴、車路士後衞泰利（John Terry）等嘅辣跑拉花o架！今次同YouPorn合作，唔知會唔會引發「關公災難」呢？
網址：www.youporn.com/win/car-design/
YouPorn一話宣布搞比賽，唔使問傳媒梗爭住報道，讚佢勁話佢威，其實區區幾百萬港紙對於一個大鹹網真係散紙都不如啦！或者大家有所不知，2006年成立嘅YouPorn今年剛好10年，不過早被收歸為Pornhub旗下，Pornhub報稱一日平均有600萬瀏覽人次，YouPorn打個五折都300萬人次啦，咁多人睇，買架超跑根本冇難度，況且佢都冇話買，加上Pornhub係全球最懂得將色情光明正大化嘅「公關公司」，貴為子公司YouPorn今次好明顯係搞噱頭囉！題外話，傳媒就聚焦喺「色情超跑」喺街上行走有幾爆，但細佬就覺得，今次「Design the YouPorn Car」活動其實係「發老脾」，事關對上個月，遊戲公司Capcom宣布禁止任何有關「成人內容」贊助商參加電競，雖然冇開名，但Team YP（即成人網站YouPorn）想繼續贊助都好難，話唔定YouPorn諗，你唔畀我玩，我自己玩大佢，整架色情超跑，吸晒全球男女眼球呀！各位巴打想威又唔使戴頭盔，即刻上YouPorn網了解參加詳情喇！
辣跑一定係男人專利？講笑咩，做脫星咁好搵，加上性格火辣，真係辣跑先襯得起佢哋嘛！25歲德國金毛脫星Mareike Fox就有架2015年日產「戰神」GT-R，阿妹仲經常揸住佢四圍出巡，架車改完又改，改完再改，改到落場賽車咁，阿妹接受雜誌訪問時話前前後後花咗5萬歐元改裝（約40萬港元），佢仲喺官網同粉絲分享改車心得，果然係辣妹呀！
其實四仔界好多男女脫星都係辣跑迷，不時喺社交網晒車，但講到最威，一定係「惡搞大導」Axel Braun喇，呢位大哥由經典跑車到當今辣車都有，好似保時捷、勞斯萊斯，就連賓利都有兩架，其中一架係Bentley Supersports，擁有630匹馬力，要成500萬港紙，Axel哥喺社交網話平日用嚟代步咋，認真富貴！
撰文：祖