內地夜總會嘅價錢一啲都唔透明？咁就梗係啦！唔通好似餐牌咁擺喺門口，等你睇勻晒先至決定入唔入場咩？其實黑箱嘅價錢問題已經存在咗好耐，對消費者嚟講當然唔係一件好事，之但係背住伴侶去夜場曳曳亦唔見得係光明正大嘅事，正所謂食得鹹魚，自然要有心理準備畀夜場搶錢。
喺團購網可以買到嘅嘢有好多，從食嘅、玩嘅到用嘅乜都有，但係大家有冇諗過就連色情服務都可以透過團購網搵到呢？話說北京海澱區就有一個打住男士SPA養生會所招牌嘅色情場所，透過團購網推出保健按摩同埋足療按摩等服務，如「單人至高無上SPA套餐」等，而團購價則由688至2,980元人民幣不等。按道理，呢啲明眼人都睇得出係色情服務，應該冇可能放上團購網，點解會咁呢？喺上個月底，北京有關部門收到舉報，指養生會所坐落嘅小區發現有行為可疑嘅男女出入，而經警方調查及行動後，發現房內有2男5女，當中一對男女正喺度全裸共浴，而另一名男子原來係團購網嘅營業人員，當中嘅答案就等大家自己推敲喇！
由於台灣色情業係唔合法關係，故此色情架步要搵食，只能夠偷偷營業。當然要做到既掩人耳目，又唔可以隱蔽到連玩家都搵唔到，當中嘅考慮真係要好細心至得。新北市就有一間以「一定好的手技」作為賣點嘅色情護膚店，竟然以網購店實體取貨點作為掩飾，確係相當特別。呢間色情護膚店透過網上論壇張貼廣告，以「景氣不好共體時艱、淋巴深入護理服務，一定好的手技」作招徠，吸引有心嘅玩家幫襯。雖然廣告寫得好白好明顯，但當玩家去到護膚店時，卻發現竟然係一間網購店取貨點，入到店內，就會見到全部都係年屆30至35歲嘅越南籍囡囡等住選美。由於該店位於普通嘅公寓，加上以取貨點作掩飾，配合埋門口張貼嘅銷售廣告，若然唔係知情人士，真係好難發覺。話雖如此，由於廣告太過惹人注目關係，經過新北警方暗訪後，仍逃不過被查封嘅命運。
日本風俗店每項服務及每位風俗孃都有規定嘅收費，埋單時會逐樣同你計得清清楚楚。不過為咗令到價錢更有彈性，而玩家又覺得物有所值，位於神奈川新橫濱車站附近嘅風俗店「亂妻」，推出由風俗孃同玩家自定價錢嘅玩法。呢間人妻風俗店嘅收費，本嚟同其他嘅風俗店一樣，為咗提升競爭力，佢哋推出呢種新嘅玩法，等風俗孃自由定價，唔使再由風俗店統一價錢。據風俗店負責人稱，最大嘅好處係令風俗孃嘅工作時間變得更加有彈性，須知道「早餐價」不嬲比「晚餐價」平，而部分優質嘅人妻風俗孃好多時只喺早上開工，面對收入少咗嘅情況，令佢哋失去投身風俗界嘅動力，家陣價錢任佢哋定，收入自然有保障。雖然話就話係自由定價，但風俗店仍有指導性收費，透過風俗孃及玩家匯報番嚟嘅價錢，進行一輪計算後計出平均價，並且每日都進行更新，作為供玩家同風俗孃參考之用。
撰文：魂