所謂苦難磨出真英雄，一個人如果唔經過艱辛又點可以練出一身好本領呢！呢個道理唔單止適用於男人身上，女仔亦一樣得，好似AKB48成員峯岸南咁，經歷緋聞纏身之後，家陣就變得更有實力兼且仲索咗好多添！
身邊好多朋友都叫小弟減肥，話瘦咗會更有型更容易溝女。老實講，唔係我唔想減，而係減咗肥之後一定冇家陣咁得意可愛咁討人歡喜，試問又點樣冧到女，除非好似峯岸南咁出類拔萃，無論肥定瘦都咁吸引啦！
峯岸南今年23歲，係日本超人氣美少女團體AKB48嘅現役成員，大家都知道呢隊女團出名夠可愛夠活潑，而峯岸南亦唔例外，眼大大夠精靈，青春活潑得嚟仲帶點淘氣，連一向鍾情成熟美女嘅我都覺得阿妹相當討好。以往，峯岸南以肥肥哋嘅身材凸顯可愛感覺，帶肉感嘅鮮嫩豐滿身材的確令男士流晒口水，不過近年峯岸南減肥成功，一副纖巧而帶健美感嘅胴體一樣咁迷人，而且更具火辣味道，與肥妹仔嘅時候風格截然不同，之不過一樣咁誘人。
早喺2002年，即峯岸南10歲嘅時候，她曾有機會加入藝能界，當時佢參加女子組合「Hello！Project」面試，可惜最後落選。3年之後，死心不息嘅南妹就去面試做AKB48成員，結果成功獲得取錄，自此成為AKB48不可或缺嘅一員，更多次被團隊負責人秋元康稱讚。
之不過，正當峯岸南嘅演藝事業發展得好順利之際，阿妹就唔生性走去溝仔，被傳媒發現佢同放浪家族旗下的「GENERATIONS」團員白濱亞嵐交往，仲上過對方屋企，違犯咗禁止戀愛規例，事件甚至被國際間大小媒體廣泛報道，一時間成為娛樂圈熱話。峯岸南為向樂迷致歉以及表示悔過，於是剃光頭，幸好製作單位都接受阿妹嘅悔過，只係將佢由正式成員降為後備，而近年表現甚佳嘅佢再次回歸從前嘅位置，仲努力減肥練出一副好身材，真係索到啪啪聲呀！
簡介：峯岸南同AKB48一班姊妹感情相當好，無論工作定係放假都喺埋一齊，大家想了解阿妹嘅公餘生活，不妨Click上佢嘅微博睇睇。
網址：https://twitter.com/chan__31
年齡：23歲
身高：5呎3吋
三圍：32-23-33
撰文：賢