日前本欄同大家報道過以日本AV女優為骨幹成員嘅組合「惠比壽★麝香葡萄」，喺專屬深宵電視節目上演咗玩到落花流水嘅春季運動會。估唔到，早喺佢哋之前，AV集團KMP亦已經舉辦過一次，而KMP唔單止出動全數專屬女優，更加邀請大班男男女女AV迷參與，作風親民，認真抵讚！
日本AV廠多不勝數，每間廠都有自己嘅拍片同用人風格，佢哋對於廠內活動嘅宣傳手法亦有不同，好似北都集團咁，為咗令旗下嘅相關AV消息更快傳達到AV迷眼前，於是特別創立AV新聞資訊網站R18.com，而SOD則一向會喺自己嘅官方網站發表新資訊，兩者都幫助大家取得第一手AV界消息。之但係，急驚風遇着慢郎中，KMP集團就唔同講法，消息成日都搞到神神秘秘，前年嘅KMP大獎就頒晒獎都冇人知，而早前主辦嘅「Million學園運動會」（下稱M運會）亦貫徹慢動作風格，雖然活動喺2月28日圓滿結束，但直至最近才將當日嘅盛況公開！算啦，當有心唔怕遲，小弟呻完幾句，即刻同大家報道M運會有幾好玩啦！當日KMP出動廠內全部專屬女優，加上長年合作嘅女優，合共有9個咁多！當中櫻井彩、星美梨香、乙葉七瀨、南梨奈央及佳苗瑠衣組成紅組，而友田彩也香、佐倉絆、阿部乃美久以及浜崎真緒為白組，只可惜白組本身嘅成員彩城優里菜因病缺席。
有別於惠比壽★麝香葡萄春季運動會嘅地方，M運會嘅AV女優數量係就係少好多，之不過勝在依然夠晒大堆頭，因為邀請咗數十位AV迷參加，佢哋有男有女，所以M運會可以話係極之親民嘅活動，真正做到與眾同樂。未進行兩組比併前，眾女優先嚟個熱身運動，可以見到阿部乃美久裝束整齊，仲即場用個排球當足球玩「的波」，有型有格好明顯有備而來。至於癡女王牌櫻井彩狀態就差少少，因為佢感冒仲未康復，全程戴住口罩跳繩熱身，跳完仲成個攰到碌喺室內運動場嘅人造草地添。熱身過後上演嘅第一場比賽，就係拋波入籮！兩組女優同所屬嘅市民隊員手執波仔，然後再拋上去其中一位女優高舉嘅藤籮入面，最後由白組勝出。
之後就係夾波賽跑，紅組出櫻井彩、佳苗瑠衣，白組以友田彩也香同阿部乃美久應戰，佢哋分別同AV迷黐到實，不過中間就夾咗一個排球，要一邊鬥快跑到終點，一邊夾個波唔可以跌，呢場比賽就由紅組勝出，暫時打成平手。第三場比賽就係一字長蛇賽跑，兩組女優各自排出長蛇陣，個個都要搭實前面成員個膊頭再賽跑。之後嘅第四場比賽就最惹人遐想喇！因為女優要同AV迷面對面再分別用口「擔」住巨型餅乾棒兩頭賽跑，見到佐倉絆嘟起個嘴仔，個口仲含住棒狀物，相信現場嘅男人個個都有少少血氣上湧。往後嘅幾場比賽包括騎膊馬搶帽仔、跳大繩、跳Over、閃避球、扯大纜及二人同穿一條巨型短褲嘅賽跑！最後總成績櫻井彩領導嘅紅組勝出，獲大會頒授冠軍證書，白組俯首稱臣，認真威威！
撰文：賢