以前小弟睇漫畫書都係睇圖唔睇文字，長大之後先發現原來睇文字先可以更加了解內容同角色背景。其實睇情色書籍都係一樣，了解工具書當中嘅文字描述，自然可以從中學到知識，而睇寫真集除咗睇女優嘅身材，睇埋佢嘅背景可以對阿妹更加深入了解，睇起上嚟都投入啲。
日本AV界近期傳得最盛行嘅消息，除咗係人氣小天后上原亞衣引退之外，仲有三上悠亞強勢回歸AV界。三上悠亞原名鬼頭桃菜，佢就巴閉喇，因為阿妹曾經係日本超人氣美少女團體AKB48嘅成員之一，上年佢投身AV界帶來莫大震撼，當時佢仲話下海只拍一碟，令其AV作品大賣。不過，半年之後悠亞又再拍AV，雖然係反口覆舌，但係阿妹青春俏麗，可愛氣質誘人，豐滿婀娜嘅身材更係吸引，AV迷梗係唔介意悠亞食言啦，希望佢繼續拍AV添！悠亞強勢回歸AV界嘅同時，仲推出全裸寫真集《Here you are》，當中佢展露火辣身材以及迷人面孔配合各種挑逗動作，令大家感受到呢位人氣偶像已經完全蛻變成AV女神！
書名：《Here you are》
售價：約HK$247
要成兩百幾蚊買本書，值唔值呀？咁就要睇吓你一直以嚟，有冇諗過點解中國古代會出現春宮圖，或者有冇諗過古代嘅中國究竟有冇鹹書等嘅問題喇！呢本由中國情色史專家殷登國所著嘅《色：中國古代情色文學和春宮秘戲圖》，正正可以解答呢方面嘅問題。喺1950年於台北出生、台灣大學歷史研究所畢業嘅殷登國，對於歷史、文學、筆記小說、民俗掌故等都有深入嘅認識同研究，曾推出過《千載揭秘推背圖》、《姜太公乾坤萬年歌》、《黃石公兵法》等作品。喺呢本著作中，佢從中國古代情色文學同春宮圖入手，講述當中嘅性文化發展，例如古代嘅「三姑六婆」可能性格相當鹹濕、太監同宮女不為人知嘅性生活、古代文人嘅詩詞歌賦中原來充滿偷情同挑逗嘅內容、三寸金蓮嘅細腳掌係性感象徵同調情嘅利器、古代嘅長壽男性點樣享盡艷福等。此外，佢又深入介紹春宮圖喺每個唔同朝代嘅發展，原來明代仇英、唐伯虎、清代嘅馬振、改琦、郎世寧，以至民初嘅曹涵美、胡也佛等文人，竟然都係著名嘅春宮畫家！書中更收錄咗關於中國古代嘅房中秘術同道具，內容相當豐富。
書名：《色：中國古代情色文學和春宮秘戲圖》
作者：殷登國
出版：新銳文創
售價：約HK$250
撰文：賢、魂