外國嘅成人小說就介紹得多，只係日本嘅成人小說唔知大家睇過未呢？今次為大家帶嚟呢本由日本著名懸疑恐怖小說家八頭道尾創作嘅成人小說《廢墟遊戲》，內容不但係成人級別，而當中口味之重更唔係個個接受得到，因此老套啲都要講句，細膽人士慎睇！八頭道尾對恐怖成人題材有着相當嘅心得，作為靈異迷嘅佢先後著有《蠱毒》、《學園X封鎖》等作品。而呢本小說，開宗明義寫住：「監禁你、切開你、填滿你、擁有你。我沒有發瘋。我很平靜、很享受。我……愛你。」原來一切事情嘅開端，都係因愛之名。故事講述6位網絡靈異社團嘅成員，以及兩名中途加入嘅不速之客，佢哋為咗模仿「蠱毒儀式」而去到一幢廢棄賓館。隨住其中一名女成員被發現全身赤裸，兼身上有遭到凌虐傷痕嘅屍體後，接着落嚟每晚都會出現一名受害者。最恐怖嘅係賓館嘅出口被人上晒鎖，令佢成為一個完全封閉嘅狩獵場。