正義英雄蒙面俠同鹹蛋俠，出場嘅時候威風凜凜，仲有一個共通點就係由頭包到落腳，完全睇唔到面貌同身材，如果佢哋出動嘅日子喺夏天，真係擔心佢哋熱到出熱痱喇。不過，眾多日本蒙面俠當中就有一個例外，佢蒙住面卻全身赤裸，但係宗旨一樣冇變，每次出手都係為正義而戰，佢就係《穴光幪面》！
每個漫畫家都有自己嘅風格，佢哋所繪畫嘅漫畫一般嚟講都會因應喜好同強項而繪製，好似《20世紀少年》嘅浦澤直樹咁就鍾意畫懸疑系列，而《校內寫生》嘅遊人就梗係畫開鹹濕漫畫啦。至於大師級漫畫家永井豪就鍾意畫俠士、鐵甲人，知名作品包括《惡魔人》同《三一萬能俠》，而永井大師眾多知名作品當中仲有一部相當出位，亦相當出「色」，就係《穴光幪面》喇。蒙面俠個個都係正義之士，性格鋤強扶弱，志在除魔衞道，道德操守要求相當嚴格，絕對唔會做出猥褻及不雅行為，之不過《穴》就一反呢個傳統，甚至可以話走在時代尖端，因為當時七十年代搵女人扮演蒙面俠已經夠破格，永井大師仲要佢蒙住面但係就全身赤裸裸咁登場打擊壞人，目的係為正義而戰，但係行為就有傷風化，所造成嘅矛盾認真大，推出嘅時候當然亦引起極大回響啦。
《穴》故事講述，斯巴達學校係標榜升讀名牌高中比率為百分之一百嘅優良學校，校如其名，入面嘅教職員個個都好似斯巴達戰士咁以強悍見稱，最鍾意就係對學生百般苛待同壓迫，打打罵罵甚至施以酷刑，有時教職員仲會受慾望驅使去鹹濕一下班女學生，雖然未至於搞到佢哋貞操失守，但係教職員嘅粗暴惡劣教學方法令學生們有如生活於地獄之中。就喺呢個時候，學生們嘅曙光終於出現，點解咁奇怪嘅？無錯！每當學生於校內面對重大危機，真身為女學生結花千草嘅蒙面裸體女俠穴光就會出場為佢哋打擊壞人！女俠佢武藝高強，身材更為惹火無比，裸體上陣搞到班壞人個個睇到流鼻血，就乘其鬆懈出手將對手打敗，就算未打敗，絕招一出，係男人都要投降！呢吓絕招就係「鮑魚」送面喇！使出此招時穴光女俠會飛起再張開雙腿露出鮑魚向敵人迎面衝擊！敵人通常就係咁被鮑魚嘅撞擊力以及窒礙呼吸而搞到暈倒收場，慘敗於快樂與被羞辱之間！
撰文：賢