有打工仔老友每日返工都捱捱聲，同為股民嘅佢每日見到個市更係唉唉聲，睇見佢每日都係嘆住氣咁過，真係幾慘情。其實想生活變得有趣，只需要加啲色香味就得，就好似越南有位爆乳女DJ近日喺網上爆紅，內地又眾多比堅尼女郎參加水上麻雀大賽。不過大家又點估得到，有研究指法式濕吻原來會影響健康呢？
性感美艷嘅女DJ向來係的士高內嘅焦點，而講到近期爆紅嘅女DJ，則唔可以唔提Candy Hà。呢位今年25歲嘅索女之所以喺網上爆紅，唔單止佢打碟技巧出眾，更在於樣貌俏麗兼身材玲瓏浮凸，經常以大開中門造型獻技，展露出誘人無比嘅波濤「胸」湧魅力，演出時佢更會隨住節拍舞動，令乳搖效果更上一層樓，難怪每當佢演出時，舞池中嘅男士都會好似畀人點咗穴咁企定定喺度睇。事實上，早喺佢被網民留意之前，喺胡志明市嘅的士高界擁有極高嘅人氣，並經常喺多間人氣的士高演出。可能有人覺得佢嘅美艷全靠化妝術，其實佢嘅素顏造型同樣養眼，而誘人雙子峰更極具觀賞性。
打麻雀可以有幾養眼？呢個喺湖南一個公園舉辦嘅水上麻雀大賽，就話畀大家知攻打四方城同樣可以養眼度爆燈。話說早前位於湖南東北面，平江嘅石牛寨國家地質公園，舉辦咗首屆高山峽谷水上麻將大賽，而為咗方便，唔少參賽者都着泳衣落水，趁住呢期當地氣溫高企，正好將消暑同耍樂合而為一。不過講到場內嘅焦點卻係一眾女將，事關有唔少女參賽者選擇着上性感無比嘅比堅尼上陣，迷人嘅樣貌固然令人興奮，露出嘅事業線更係養眼非常，真係唔知佢哋嘅真正目的，係咪想令對手分心。不過話說回來，如果佢哋唔小心跌咗隻麻雀落水，唔知會否潛落去執番佢呢？
熱戀男女情到濃時，總會整番個香艷無比嘅火辣法式濕吻，只係最近有研究指出呢種濕吻竟可引致頭頸癌！據英國皇家達爾文醫院頜面頭頸外科主任湯瑪斯醫生指，男女嘅法式濕吻可傳播人類乳突病毒（簡稱HPV），而根據研究顯示，有7成頭頸癌病例都係由呢種病毒引致，而佢更稱如果口咽部位感染HPV，患上頭頸癌嘅風險會比冇感染嘅人高250倍。不過研究又指，雖然HPV有超過100種類型，但當中只有8種具有高度危險性。此外，就算唔濕吻齋摸，同樣有機會傳染HPV喎！聽完佢咁講，其實法式濕吻係咪好危險啫？
撰文：魂