近年有好多荷里活科幻片都以複製人同機械人做題材，透過呢類貼近真人嘅人造人故事嚟探討人性。其實呢種題材同概念喺日本經典漫畫《實驗人形》中早就有提及，雖然深度或者未及上述電影作品，但當年已經夠晒前瞻性同大膽，最重要就係喺咁嚴肅題材當中加插咗大量色情場面，絕對適合麻甩佬細細品味一番。
如果大家唔善忘，應該記得早前介紹過一套經典日本漫畫作品叫做《淚眼煞星》，故事同畫作都相當出色，堪稱一代日本漫畫經典，佢就係漫畫家池上遼一嘅知名作品，呢套漫畫咁好睇仲要多得負責故事方面嘅小池一夫。提到小池一夫呢個殿堂級小說家，出自佢手嘅經典又點只《淚眼煞星》咁少，仲有《帶子雄狼》及今日介紹嘅《實驗人形》。《實》畫作方面就由當時嘅新進漫畫家葉精作主理，係雙方首次合作。小池一夫嘅故事以筆鋒辛辣尖銳、直擊社會同人性陰暗面見稱，至於葉精作嘅畫風則以細膩描繪人物表情同身體部分而被賞識，二人將《實》探討人性嘅主題落實，創造出呢部極具爭議性嘅漫畫，令人印象深刻。
《實驗人形》嘅人形即係人偶，故事講述男主角渡胸俊介係一名天才人偶製造師，經佢手所製造嘅公仔個個都栩栩如生，甚至可以話係有血有肉，部分仲有感情，識得流眼淚添。正因為咁逼真，故被多方面邀請製造專用人偶，例如警方搵佢造人偶用嚟畀警員練靶，亦有汽車公司需要人偶嚟做撞擊測試，更有闊佬怕百年歸老諗住用人偶嚟更換腦袋以延長壽命等，過程中就帶出人偶有血有肉又有感情，雖然係由人造出嚟，又係咪可以將佢哋肆意殘虐、摧毀嘅問題，其實同家陣好多電影嘅複製人橋段差不多。故事嘅深層意義的確係幾嚴肅，但係大家千祈唔好卻步，因為當中有好多色情場面點綴。男主角幾乎同每一個出現嘅女性都會發生激烈又意淫嘅性愛關係，漫畫經葉精作嘅細膩畫功描繪之下，令場面更逼真到肉。雖然種種性愛場面都可以話係突如其來，例如男主角同女車手揸緊車都會突然同坐一位交歡係有少少為做而做，但係招式同意念又幾新穎，不能不讚。
撰文：賢