小弟後生嘅時候，邊度好似家陣有咁多日本AV睇，為咗滿足對性嘅好奇心，故要靠鹹濕漫畫嘅幫助，而畫得好睇兼夾到肉嘅亦係來自日本嘅多本漫畫，今日為大家介紹嘅《校內寫生》絕對係小弟印象中最深嘅其中一本，相信好多七、八十後嘅朋友對佢亦一樣咁有印象。
網上一首來自《聖鬥士星矢》主題曲嘅改編歌，其中有句歌詞好適合用嚟形容七、八十後嘅朋友，就係「其實個個自細，日本漫畫裏做奴隸」，呢個年紀嘅朋友娛樂唔多，冇上網冇手機，打機又冇咁多遊戲玩，除咗睇電視之外，最常見嘅娛樂活動就係睇日本漫畫喇。一班男仔除咗睇《龍珠》，漸漸大個仔對美女嘅胴體感興趣，北条司嘅《城市獵人》以及《CAT'S EYE》可以初步滿足需要，但係要進一步呢？我相信當年只得遊人嘅作品做得到。提到呢位漫畫家，佢由1979年開始出版漫畫，作品名叫做《同姓契約》，然而之後出嘅漫畫單行本銷量欠佳，據聞佢就用咗十年時間去鑽研漫畫創作以及捕捉漫畫迷嘅心態。1988年，遊人嘅《ANGEL》開始連載，入面嘅女角設定精美，個個都係嬌艷欲滴，青春味濃卻又發育優良嘅初熟美少女，一時間令遊人名氣急升，適逢當時美少女遊戲熱爆，好多遊戲都搵佢畫插畫，加上其他插圖工作，遊人親口表示九十年代嘅九年期間勁搵十億日圓，賺錢賺到喺神奈川住豪宅！
遊人最出名嘅作品除咗《ANGEL》，對於好多男仔嚟講當然係《校內寫生》啦！呢部以校園做背景嘅漫畫，男女主角都畫得相當優美，表面上少不更事，睇落其實充滿青春情懷。《校》同遊人以往嘅作品不同之處，在於以短篇形式進行，幾乎係每回一個故事，連貫性唔強，之但係集集不同內容卻令人充滿新鮮感，當然最重要就係集集都充滿性愛元素，有男女激戰，亦有好多係女性自娛，對於一向貪新忘舊嘅男讀者嚟講，每本單行本都帶來豐富又多元素嘅刺激性。再者，《校》仲不時有惡搞元素，其中一回就有個女仔變身為巨大嘅鹹蛋超人大戰巨型烏龜怪，打打吓女超人居然用對手個頭嚟滿足自己，認真搞笑。另外，故事令人好嬲又好笑嘅地方仲有裸女莫名其妙咁出現，有一回就講個男仔做完割包皮手術，但係有女仔不斷向佢走光，後來仲有個裸女突然同佢搭電梯，最後一格嘅畫面係男生胯下嘅地板出現血漬！當然，好笑以外淫猥場面亦相當到肉，絕對係經典之作。
撰文：賢