有朋友話雙子座嘅人性格好難捉摸，但其實要講難捉摸，應該係雙魚座至真，因為佢哋五時花、六時變，變化之間完全冇手影捉，真係估佢唔到。至於咁估佢唔到嘅雙魚座愛情運如何呢？馬上同大家介紹一下！
天生愛心爆棚，而且極喜歡感性嘅雙魚座朋友，因為受到土星嘅引力影響，所以今年感情運不俗，而且勇不可當，雙魚座嘅朋友今年會出現兩種情況，一係四圍等畀人電，佢哋好似手機裏面嘅Wi-Fi接收器，只要有人對佢有一點點眼神表示，佢哋都會第一時間接收到，自己化為愛嘅表示，當然九成都係自己諗多咗，但十次當中總有一兩次會畀佢撞中，所以今年桃花處處，最利嘅位置，就係自己經常出沒嘅地方，例如辦公室或者學校。講埋另一種情況，就係你會向心儀嘅對象不斷放電，唔理人哋有冇反應，你都會勇往直前，纏至對方狠狠拒絕你或者出現新嘅獵物，你至會放棄，你話遇上呢啲朋友，你唔頭痕都幾難，但亦因為佢哋擁有大無畏嘅精神，所以情路暢通無阻。
已經拍拖嘅朋友亦係估佢唔到，舊年兩口子好好哋嘅，今年有可能會分手，但咪以為佢哋會傷心好耐，只要有新人出現，佢哋又會忘記傷痛，努力向前！反而舊年感情變淡，差啲要分手嘅情侶，今年佢哋又唔知黐起邊條筋，竟然對你百般呵護，千依百順，如果你識得看風使，屈佢結婚都冇問題，你話係咪估佢唔到！至於已婚嘅雙魚座朋友今年感情比較波動，對另一半用情愈深，你會愈糾纏對方，甚至挑剔對方，所以成日都會爭執，勸大家嘈少啲啦！將你表達愛嘅方法改改吧！咪睇咁多韓劇，成日吵吵鬧鬧，咁你嘅感情生活想好都難，做人都係簡單啲好，愛就好好去愛，咪搞咁多小動作，凡事以和為貴，婚姻生活才會開花結果，一帆風順！
最佳數字：5、7、9
最佳顏色：藍色
最佳寶石：藍寶石
最佳位置：辦公室、學校
狩獵運：4★
甜蜜運：3.5★
戰鬥運：4.5★
撰文：小德