有啲朋友談情說愛喜歡光明正大，直來直往，但亦有人喜歡曖曖昧昧，神神秘秘，如果你係山羊座嘅朋友，咁今年你嘅愛情生活就會變得曖昧，就算拍緊拖熱戀中嘅朋友，你哋都會受到運程影響，漸漸走向低調同神秘。
山羊座嘅朋友今年婚姻宮出現木星，木星代表神秘，愛情方面會變得低調，加上山羊座嘅朋友過於冷靜嘅性格，凡事思前想後，所以感情上嘅表現會更加令人難以捉摸。先講未有另一半或者啱啱分手嘅朋友，今年桃花運不錯，特別喺9月7日至10月3日，係個魅力四射嘅日子，要結識新戀人，會比較得心應手。至於其餘時間山羊座嘅朋友都有機會，但就會辛苦一點至可以追求到另一半，而追到手還追到手，由於受到木星影響，你嘅熱戀期好快會完結，之後會變得忽冷忽熱，新對象忍受得到曖昧還好，否則呢段新戀情都係凶多吉少！
已經拍緊拖嘅朋友，舊年彼此關係仲係唔錯，但一到今年，就會出現好多問題，為免爭拗，山羊座嘅朋友會選擇大家少啲見面，因此感情會轉淡，甚至變得曖昧。如果另一半忍受得到還好，萬一另一半無法忍受，就會有分手嘅可能。所以建議山羊座嘅朋友，今年多同另一半作深入溝通，講出你哋嘅問題所在，不要因為唔想吵架而減少約會，甚至唔想見面，咁都係於事無補。
至於成咗家嘅朋友，因為同樣受到木星影響，行事會變得古怪，為免另一半誤會，多啲表達自己所思所想，總好過要另一半胡亂猜想，情況到了秋天就會好轉。而尋找戀人嘅位置，適合有火嘅地方，凡係熱死人嘅場所或者有電嘅地方，例如遊戲機中心、卡拉OK等，甚至上網或手機都對你有幫助！
最佳數字：3、5、9
最佳顏色：紅色
最佳寶石：紅寶石、紅粉晶
最佳場地：戶外、遊戲機中心
狩獵運：★★★★
甜蜜運：★★★★
戰鬥運：★★★★
撰文：小德