一直畀人認為讀得書嘅囡囡都唔慌靚女，但原來呢個觀念係錯嘅，東京最高學府就靚女如雲。男女首次約會，邊啲說話一定唔可以講呢？稍後就話畀大家知！虛擬情人軟件令你可以享受到情話綿綿，但單係情話就足夠嗎？
日本當地最難考入嘅大學一定非東京大學莫屬，裏面全部都係精英中嘅精英，而男女學生比例八成係男生，只有兩成係女生，亦因為考得入嚟嘅全都係書呆子，所以一直被外界認為「東大無美女」，但有三位法學院學生決定為東大女生洗脫「罪名」，於是喺課餘就為東大美女拍攝照片，之後逐一放上網分享，竟然好評如潮。由於反應太好，於是更推出寫真集，而最近準備推出嘅第三本寫真集，更搵咗五十個東大靚女拍攝，睇嚟呢鋪真係「大晒冷」啦！
最近有分享網站做咗個調查，就係男士同女士首次約會時，最令人掃興嘅五句說話，呢五句說話殺傷力真係幾強，巴打們真係要留意。第五句係提到未來仔女嘅名字，講到咁遠發神經咩！第四句係扮晒幽默咁講你係肥定有身孕呀？聽到肯定畀人摑一巴！第三句係提及前女友，例如你喜歡飲檸茶？其實我前女友都好喜歡！死得啦！第二句係提及老母，例如呢度好正，下次要帶埋阿媽嚟！裙腳仔返歸啦！第一句係等我影張相先。呢個時候玩自拍！唔係嘛？
最近美國有間軟件公司開發咗一個專幫助孤男寡女嘅App，用戶只要登記個人資料同埋填寫好理想情人嘅種種要求，好快就會有一個「虛擬情人」，透過短訊嚟同你噓寒問暖，就算你心情唔好，佢都會有辦法令你怒火全消，氹得你開開心心，收費方面每個月要廿五蚊美金，即係兩百蚊港幣左右，據講用戶反應好好，家陣只有美加有得玩，香港嘅朋友睇嚟要等一排至有得玩，但香港嘅巴打話如果傾談內容可以提升至三級，咁相信反應會更加好喎！
撰文：小德