介紹完十二生肖嘅愛情運之後，師傅話繼續我哋嘅愛情生肖排行榜，由於仲係新春期間，所以嚟緊幾期我哋都會以乙未年流年大運嚟預測，首先預測吓今年會嫁到有錢人嘅生肖，想知道嘅朋友就要留意我哋欄目啦！
師傅話屬馬嘅朋友適逢六合，所以今年人緣和順，身邊貴人湧現，未有男朋友嘅囡囡有機會出現真命天子，而且此人非富則貴，初出現時能助你工作和生意上渡過難關或者火速發展。由於大家非常夾得嚟，所以彼此將會一拍即合，下一步就開始談情說愛，如果到適婚年齡，更有可能今年內就拉埋天窗，最意想不到嘅就係囡囡唔到結婚階段，都唔知道另一半嘅身家咁厚，所以嫁入豪門嘅機會最大，屬馬嘅囡囡真係要好好把握機會，機不可失呀！
今年有月德天喜兩粒吉星相助，所以屬虎嘅囡囡今年行正大運，事事心想事成，就算唔打算結婚，工作和事業都會特別好運，但如果一心打算嫁個有錢人嘅，將會係千載難逢嘅大好機會，建議你多去人多嘅地方，特別係親友嘅喜宴，一來可以沾染吉祥之氣，二來可能從親友身上認識到超級筍盤，但記住要順其自然，如果名草有主勿做啲強搶破壞嘅事，否則搶到返嚟都會冇運行，如果一切順利，隨時可以喺今年年尾就嫁得出去，疊埋心水做少奶奶！
生肖屬鼠嘅朋友今年有紫微和龍德兩粒吉星相助，所以行運一條龍，特別係出嚟工作嘅女性，得遇貴人相助。雖然今年犯太歲，但影響不算嚴重，只係工作要加倍努力同埋要小心處理是非小人等事情，不妨留意身邊嘅生意拍檔或者上司，會因為你嘅表現而對你青睞，講唔定感情會有進一步發展，但一定要自己先付出，至會有收成，記着要工作成功，真命天子至會出現，否則自己工作一團糟，咁想有好姻緣都難，所以努力多少，收穫就能得到多少。
異性運：羊、狗、豬
桃花運：鼠、牛、龍
和合運：兔、馬
撰文：小德
玄學提供：寶源師傅