渡海濠情：天秤男士愛情慢熱

要數十二星座中愛情路上最慢熱嘅男士，一定非天秤座莫屬，佢哋身邊異性無數，但要佢哋向其中一個示愛，真係難過登天，嚟自大富豪桑拿嘅小倩就遇到咁嘅情形，唔知有冇辦法，要男朋友快啲開口同佢表白呢？

好心照顧

小倩話：「我識咗呢個男仔有成兩年，由朋友嘅朋友帶佢嚟聚會認識，由於佢外表俊俏，說話得體，所以好多姊妹都好冧佢，個個都圍住佢嚟轉，之後就同咗我嘅好姊妹拍拖，但拍拖三個月唔夠，我嘅好姊妹就嘈住話要分手，具體原因就冇講，加上佢一飛咗呢個男仔就搵到另一個男友，自此就同我音信全無，但呢個男仔有時候仲會嚟我哋嘅聚會，我怕佢失戀心情未平復，於是主動同佢傾偈，發覺同佢都幾好傾，而且好多興趣都同我好夾，於是咪同佢走埋一齊囉！但佢從來冇同我表白過，話要我做佢女朋友，所以我哋嘅關係真係唔清唔楚，但我又真係好衰，佢一叫我出去，我就會聽晒佢話咁出去，後嚟愈嚟愈熟落，我哋仲發生埋關係添，當然係超友誼嗰隻啦！」

弄巧反拙

咁仲唔要佢同你表白？小倩話：「我都諗住係咁，但由於我嘅第一次實在太精彩，我掛住回味，慢慢就瞓着咗添，之後每次出嚟都掛住搞嘢，都唔記得要問佢我嘅身份究竟係乜嘢？就係咁樣我哋喺埋成年多，後嚟我覺得始終要有個身份，於是借啲意問佢想點？但佢就支吾以對！有一日我遇番同佢拍過拖嘅姊妹，一問底下至知，當日情況原來同我一樣，我姊妹就係逼佢要表態，最後逼極都逼唔到，於是就一氣之下說再見，佢仲話天秤座嘅男人就係喜歡曖昧，要佢哋表白真係非常困難，除非女友逼到佢哋就範，否則有啲女伴跟佢成世都冇個身份呀！但我又擔心逼得佢太緊會弄巧反拙，所以奉勸各位姊妹，喜歡身份清楚嘅就咪搵天秤座嘅男士做情人，否則有排你煩呀！」