家陣睇戲真係冇乜感覺，一來劇情一般無甚吸引，二來優質嘅演員甚少，唔能夠將角色嘅神髓充分演繹。在此除咗建議佢哋要多多進修，仲可以搵船岡咲幫手，因為阿妹唔單只嬌俏可人，仲正修讀心理學，樂於幫助同台演出嘅演員投入角色。
正所謂「寧欺白鬚公，莫欺少年窮」，雖然家陣好多年輕一輩都好食懶飛甘做御宅一族，但係亦有好多後生仔女身懷絕技，好似早前為大家介紹過嘅22歲日本水着妹廣瀨玲奈咁，佢除咗係一名人氣水着妹，仲係搖滾樂好手，更加喺音樂雜誌教人彈電子結他及作曲，認真後生可畏。除咗玲奈之外，今日同大家見面嘅青春妹妹仔船岡咲一樣係年輕有為，幫助唔少同事應付工作。21歲嘅船岡咲活潑而帶柔弱感，話靚就唔算好靚，但係勝在笑起上嚟甜到漏，充滿陽光氣息，一樣可以令男人心曠神怡。而身材方面，船岡咲屬於微乳系，幸而阿妹佢皮光肉滑，腰肢纖巧而玉臀飽滿，總體嚟講都甚有吸引力。
船岡咲的確好年輕，但係資料顯示佢出道嘅日子仲年輕到嚇你一跳，因為當年係2003年，即係話當時阿妹只得10歲。冇錯！阿妹佢10歲就出嚟拍戲同拍廣告，12歲就推出寫真DVD，到18歲就登台做舞台劇演員，亦參加過不少選美活動，例如係「K-1甲子園2009寫真偶像選舉」等，真係估唔到呢個妹妹仔年紀小小已經有咁深厚嘅演藝經歷。現時為止，船岡咲喺舞台依然活躍，近期有份演出嘅作品有《戰國降臨女•ReBirth》。阿妹喺舞台界甚為吃香，除咗因為佢演戲有水準，更因為佢正在修讀大學心理學科，不時喺後台運用其心理學知識同技巧，幫助其他演員投入角色，咁幫得手梗係受人歡迎啦！舞台劇以外，佢嘅青春甜美外形亦受到電視台同電影界賞識，今年8月就參與電視劇《遺物搜查Special》以及電影《死之實況中繼》演出喇，睇嚟阿妹有機會繼綾瀨遙之後成為灸手可熱嘅人氣女演員喎。
活躍於舞台界嘅船岡咲經常因應舞台劇嘅角色需要而作出不同扮相，每次化妝同裝身之後都會自拍，並將照片傳上博客，想知阿妹最近又扮過甚麼特別角色，就要上佢個博客睇睇喇。
網址：http://ameblo.jp/saki-funaoka/
年齡：21歲
身高：5呎3吋
三圍：30-22-32
撰文：賢