據講法國有裸體愛好者多達150萬人，更有專門安排裸體活動嘅組織天體愛好者聯盟（French Federation for Naturism），而呢個組織喺10月底就喺法國東部Mulhouse，舉辦咗一場國際裸泳大賽。呢場賽事雲集咗嚟自9個國家，分別有法國、瑞士、加拿大、西班牙等超過200名裸體愛好者參加，當中最有實力莫過於有專業泳手參賽嘅德國，而結果亦順理成章獲得冠軍，舉辦國法國則屈居亞軍。據聯盟負責人Yves Leclerc表示，所有參賽者都要遵守裸體嘅規定，唯獨幾位評判至有衫着。此外，為咗唔想令泳池嘅其他使用者尷尬，佢哋將泳池四周窗戶事先遮擋起嚟。至於下屆比賽喺邊度舉辦，佢就話要等通知，只係佢明言下屆法國一定要攞番個冠軍返嚟。