日本70、80年代所掀起嘅「粉紅色電影」熱潮，以香艷、奇詭嘅風格不但令電影業邁進一個輝煌時期，更捧起唔少人氣兼艷光四射嘅女優，而講到喺芸芸粉紅女優中，則唔可以唔提有綑綁天后之稱嘅高倉美貴。
1960年12月14日於日本石川縣金沢市出生嘅高倉美貴，一直喺當地生活並度過學習時期，直到佢喺私立北陸學院高等學校畢業後，就搬到東京從事童裝工作。不過外形艷麗嘅佢好快就被星探發掘，而當時亦有心喺藝能界發展嘅佢，便以越沢美紀嘅藝名出道，除咗從事藝能工作外亦接拍廣告，並為雜誌GORO拍攝寫真。及至1983年，佢被日活電影公司睇中，演出著名粉紅愉虐電影《團鬼六 美女繩地獄》中檜山光子一角。雖然出生金沢一個地位顯赫家庭嘅佢並無透露有冇被屋企反對，但從佢多年嚟都鮮有提及家人便可知一二。不過正正係呢個決定，不但令佢打響名堂，更成為日活電影公司內，繼谷直美同麻吹淳子後成為第三代愉虐天后！
由於《團鬼六 美女繩地獄》獲得極好嘅口碑同票房，其後高倉繼續接拍呢個系列嘅電影，分別有同年嘅《團鬼六 美女繩化妝》、1984年嘅《團鬼六 修道女繩地獄》同《團鬼六 繩酷刑》等五套《團鬼六》系列作品。憑住呢個系列嘅成功，高倉不但以超誘人嘅外形及極具官能刺激嘅演出，成為粉紅電影界嘅代表人物之一，更係票房嘅保證。與此同時，佢亦經常亮相電視台深宵電視劇，令佢迷人形象更加深入民心。據佢形容當時演出電視劇係種相當好嘅調劑，難怪當佢同日活喺1985年約滿後，便馬上離開粉紅電影界。先後經過兩次婚姻嘅佢，於1993年宣布同電視演員原田伸郎結婚，而婚後亦宣布從藝能界引退。
撰文：魂