最近雲集眾多動作巨星嘅電影《轟天猛將》最新一集上映，巨星當中仲有我國代表李連杰。雖然論身形，杰哥比其他巨星係細粒咗啲，但若然講到真功夫，杰哥絕對唔會輸畀佢哋。事實上，細細粒又打得嘅喺日本水着界當中亦有不少，森田涼花就係其中一位喇。
弱肉強食，以大欺小係大自然定律，大家只要收睇各種動物生態紀錄片，都可見到獅子、老虎、獵豹，經常捕獵身形較小嘅年幼動物。之不過，喺人類社會，細細粒容易食嘅理論好多都唔適用，大家睇吓鄒市明咁好打就知喇。除咗呢位近期活躍拳壇嘅拳手之外，水着界嘅小巧美人兒亦一樣唔好蝦，就好似森田涼花咁。今年21歲嘅涼花妹嬌俏又可愛，臉上散發出嘅純情氣質令佢睇落似十來歲嘅妹妹仔，笑起上嚟除咗令人有如沐春風嘅感覺，仲帶出一種好似冬日陽光般嘅溫暖。涼花身材瘦削，上圍係就係冇乜睇頭，但勝在肌膚又白又嫩，加上骨肉勻稱，絕唔會覺得佢瘦骨嶙峋、營養不良，而結實嘅肉地仲顯得十分健康添。
涼花喺2006年被發掘為女演員，憑住活躍嘅特質而爭取到唔少觀眾支持。出道兩年後，仲被挑選為偶像團體「Idolling!!!」成員，除咗經常作舞台演出，亦開始成為電視台綜藝節目嘅常客，同其他成員齊齊成功入屋。同好多女演員一樣，涼花亦都會涉足水着界，雖然身材唔夠其他水着妹咁豐滿，但係健康氣質依然吸引到唔少水着迷。而阿妹之所以咁健康，應該同佢由細細個已鍾意做運動有關。涼花擅長陸上運動，據聞佢喺初中時就係短跑好手，能夠於7秒之內完成50米賽事，喺學校陸運會跑100米，更冇人叻得過佢。涼花除咗賽跑，喺小學三年班就學習柔道，從而練得一副好身手，更幫助到佢爭取唔少演出機會，自從演出特撮劇集《侍戰隊》當中嘅黃戰士，阿妹武功底子就被賞識，往後演出好多戰隊片如《特命戰隊》、《天裝戰隊》等需要打鬥嘅作品。今年阿妹演出嘅電影《戰鬥少女 血之鐵仮面伝說》都係要佢打生打死，看來有機會成為新一代動作女星。
年齡：21歲
身高：5呎2吋
三圍：31-23-31
森田涼花經常會喺博客上載生活同工作時拍低嘅照片，每張都可以見到阿妹燦爛嘅笑容，心情鬱結的話Click上去睇吓，一定令你精神一振。
網址：http://ameblo.jp/morita-suzuka/
撰文：賢