模影模蹤：廣村美津美 唔扮正義做邪派

翻版惠梨香

手袋、衣服有翻版，一般嚟講品質都比正版為差，至於人亦一樣有翻版，大家不難從娛樂版當中，見到執筆者形容某新人女星為「翻版乜乜」、「翻版物物」，但佢哋嘅質素就比唔上正版；但有翻版戶田惠梨香之稱嘅日本水着妹廣村美津美，我就覺得佢比惠梨香更加吸引。今年25歲嘅美津美青春可人，笑容可親，仲唇紅齒白，眼大有神，認真精靈可愛，的確同惠梨香有八、九成相似。之但係，美津美一定比惠梨香更好身材，至少其C-Cup上圍肯定大過佢。另外，身高5呎6吋嘅美津美，高得嚟骨肉勻稱，肉地結實又彈手，唔單只帶出火辣感覺，仲有濃厚嘅健康氣息，相反偏瘦嘅惠梨香則只有病態美。

鍾情奸角

美津美於2008年出道，當時佢參加咗一個由網絡節目《SCHOOL OF LOCK！》搞嘅選美活動，並奪得冠軍從而加入藝能界。同年6月阿妹更獲選為帛硫群島親善大使，去接受此職銜嘅時候，仲得到帛硫群島總統親自致送花環作鼓勵，認真威水。其實，美津美都好有選美運，參加「Miss東京Girls」比賽就從九千二百位參賽者當中，獲得審查員特別獎；參加《Weekly Playboy》同《少年Jump》合辦嘅「寫真偶像JAPAN 2010」亦成功入圍16強。而從咁多選美活動中突圍而出，令美津美甚受電視台同電影界歡迎，獲邀演出嘅節目包括《蒙面超人Foze》，電影就有《不及格》、《櫻蘭高校男公關部》。最近，美津美可能覺得喺眾多演出當中，都係扮演純情乖乖女冇乜突破，最近為音樂劇《美少女戰士》演出，就特別揀咗個邪派角色艾絲美露嚟做，造型仲相當妖艷迷人添。

廣村美津美 Profile

年齡：25歲

身高：5呎6吋

三圍：33D-24-33

個人博客

廣村美津美工作相當繁忙，想知道佢將會去到邊度演出以及做乜嘢電視節目，上佢個博客就一目了然。

網址：http://ameblo.jp/mi3tsu2mi3/

撰文：賢