男人愈粗愈好，愈粗愈能夠吸引異性！唔好心邪，我係指男人嘅手臂以及頸下嘅金鏈；至於女人就愈幼愈好，邊度幼？點幼法？當然係腰肢啦，至於幼成點至夠吸引，好似日本水着界嘅纖腰女王杏小百合咁，擁有21吋小蠻腰就夠喇。
日本水着界百花齊放，要搵個十幾二十歲、正值花樣年華嘅嫩口妹妹仔有大把；面孔成熟但係依然保持住一副充滿彈性又婀娜身段嘅廿幾歲女優亦不少；年過三十，韻味特濃兼夾身材苗條迷人嘅一樣大有人在，山本梓、杉原杏璃同星野亞希當然係絕佳例子，至於近期再次活躍起嚟嘅杏小百合同樣係水着界當中嘅輕熟女模範。現時30歲嘅杏小百合出道拍寫真已經有14年咁耐，想當年佢可愛活潑，青春逼人，家陣雖然年紀增長不少，但係變得成熟嘅面孔卻散發出一股攝人魔力，佢一雙明亮眼睛電力非凡，定力不足嘅男人分分鐘畀佢電到三魂唔見七魄。小百合嘅上圍雖然同佢個名一樣，屬於小型甚至係微型，但有纖腰女王別名嘅佢條腰只得21吋咁幼，所以望上去依然不失婀娜之感，加埋鮮嫩白滑嘅肌膚，一樣散發無比誘惑。
2000年，杏小百合參加Miss Young雜誌舉辦嘅選美活動而踏足藝能界，雖然只喺比賽得到第四名，但係憑住迷人嘅面孔以及纖巧又誘人嘅身段，令佢上位速度極快，人氣與同期出道嘅水着妹磯山沙也加、中川翔子有得揮。人氣高企幫助小百合除咗喺水着界發展迅速，仲獲得電視台賞識，有佢演出嘅電視劇《黑色太陽》、《星期三懸疑劇場：神樂坂署生活安全課3》等，可以話係近十年喺電視界曝光率最高嘅水着妹之一。另一方面，由於小百合喺英國留學，故此講得一口流利英語，所以阿妹曾主持教育節目《開始說100個單詞吧！英語會話》負責向觀眾教英文。到近期，可能因為水着妹新進湧現，一度令小百合失去地位，之不過，阿妹佢又冇怨天尤人意志消沉，反而將演出嘅激烈程度提升，據聞佢會喺一部即將上映嘅血腥電影《奴隸區我與23人之奴僕》有破格演出，又睇吓小百合能唔能夠再次將人氣谷起喇。
杏小百合近期為宣傳相隔八年推出嘅寫真集《Anzu Returns》日夜宣傳，大家想知道佢最近又去到邊度出席相關活動，可以Click去佢個博客。
網址：http://ameblo.jp/sayuri-anzu/
年齡：30歲
身高：5呎5吋
三圍：32-21-34
撰文：賢