喜歡食避風塘式食品嘅朋友，今日推介嘅避風塘炒魷魚真係要試吓，話說前兩日約咗人上大富豪桑拿沖涼兼睇波，由於等到三點幾，個肚已經有啲餓，問侍應仲有乜嘢好介紹，佢話有個精選套餐，嗰味避風塘炒魷魚值得試吓，一邊食一邊飲啤酒，睇起波嚟都特別有味道。聽落又幾吸引，於是就叫咗份嚟試吓，估唔到手法十分地道，蒜蓉炸得恰到好處，食完魷魚，再逐粒夾嚟食，都非常可口，最後成碟蒜蓉食晒，可知有幾咁滋味。講番主角，啲魷魚洗乾淨後，用鹽醃咗一段時間，之後乾身上蛋漿同炸粉，師傅上漿十分講究，薄薄一浸，跟手放入油鍋裏炸，轉金黃即撈起待用。當客人點菜時，師傅用蒜頭辣椒起鑊，炒香後將魷魚回鑊快炒，之後再加入剛炸好嘅蒜蓉，上碟時熱辣辣、香噴噴，入口時外脆內嫩，魷魚嘅鮮同蛋漿嘅香，再配埋蒜蓉同辣樣嘅味道，令魷魚口感豐富，好食到唔停到口！