今日再談談澳門點解會出現上樓「花舫」呢？話說上世紀初，澳門要擴充土地，先後填咗內港嘅三個避風塘，當時喺避風塘搵食嘅花舫，冇一百都有八十，佢哋嘅艷名不遜色於岸上嘅名妓，最重要係佢哋一直打自己工，唔習慣妓院嘅經營方法，但填唔填海，唔到佢哋話事，於是只能結業另圖生計。囡囡改行容易，客人冇得尋歡作樂就大件事，於是填海工程展開冇耐，就有人諗到不如將花舫搬上岸經營，但正所謂多隻香爐多隻鬼，福隆新街一帶嘅妓院老闆當然唔畀佢哋如願，用盡方法令上岸花舫開唔成。但你愈壓迫，反抗就愈大，有人建議將花舫搬進新建嘅多層大廈內，呢啲新大樓嘅老闆大多係有勢力或者外國人士，所以妓院老闆們無法阻止，於是最先就有酒店畀佢哋入戶，之後陸續喺戲院同埋娛樂場都設有花舫嘅玩意，最後好似雨後春筍咁樣，喺澳門遍地開花。