廣東人對欖菜一定唔會陌生，因為好多餸菜都會用欖菜嚟做，但唔講唔知，呢個世界原來係冇欖菜嘅，家陣食到嘅欖菜，係將橄欖同埋芥菜，主要係鹹酸菜，撈埋一齊醃製而成，所以咪去街市買新鮮欖菜，盞畀人笑到面黃。前兩日就喺大富豪桑拿食咗碟欖菜炒四季豆，本來係好平凡嘅菜式，但大廚以泰式風味炮製，食落別有一番風味，首先啲欖菜經特別加工，加入香茅、南薑同埋金不換等泰式香料調味，單係欖菜就已經香到不得了。四季豆先走油，六成熟就撈起備用，再用少少橄欖油起鑊快炒碎豬肉，之後將四季豆回鑊，再加入秘製欖菜一炒，每條四季豆都沾滿欖菜同豬肉嘅香味，要嚟送飯，真係好食到停唔到口！