近年日本美食風靡香港，大家見到壽司、拉麵、烤肉店開到成行成市就知喇。充滿和風味道嘅美食之外，另一種和味亦一樣令老一輩嘅影迷到今日依然回味，而呢種和味嘅來源就係風情萬種、演技一等一嘅名取裕子喇！
個別女星之所以拍脫戲，美其名就話係為藝術犧牲，實質佢哋好多都係處於人氣低谷，希望可以一脫成名。而佢哋同日本拍脫戲嘅女演員真係天壤之別，唔信咩？名取裕子就可以話畀大家知有幾大分別喇。裕子於1957年出生，出生地係神奈川縣嘅蜂須賀市，畢業於青山學院大學文學系日本文學專業，而喺佢讀高中嘅時候就已經氣質非凡、典雅脫俗，據聞佢同日本知名男演員六角精兒嘅家姐係同學，二人嘅美貌都迷倒校內萬千男生，讀大學嘅時候更有男生幫佢開咗個粉絲俱樂部添，可見裕子幾咁迷人。可能因為裕子咁出名，仲傳到去星探耳邊，所以佢在學時期已被拉攏加入藝能圈，同時參加選美活動「Salad Galle競賽」。雖然裕子得唔到獎，但係就備受注目，後來仲有機會演電視劇添。
裕子拍嘅頭一部電視劇係《愛與憎恨之宴》，後來佢喺《3年B組金八先生》表現突出，故往後獲得大量演出電視劇同電影嘅機會，知名嘅作品包括《京都地檢之女》等。由於裕子拍嘅電視同電影作品總共有17套改編自知名作家松本清張嘅小說，所以裕子仲有「清張女優」之稱。裕子現時依然活躍於電視界，上年嘅名劇《安堂機械人》以及今年嘅《影武者德川家康》都有其戲份。而裕子拍過咁多電影當中，有唔少都作裸露演出，包括《澄賢房覺書》、《序之舞》以及《吉原炎上》等。裕子於多部裸露作品都以和服上陣，本身已經夠晒古典優雅嘅佢仲着上和服更能凸顯和式風格同美態。裕子於戲中同男主角溫馨纏綿，和服半脫，加上其胸前一對乳尖上翹嘅乳房，更加令作品和味之極！
撰文：賢