澳門嘅典當業仲有一個習俗十分有趣，就係有父母會把剛出生嘅嬰兒攞去當舖典當，坊間稱為「當蘇蝦」或「當人仔」。據講澳門早十零廿年前仲十分流行，街坊講父母典當小朋友，並唔係家中冇錢，反而有好多都係大富人家，將仔女典當畀當舖原來係一種祈福儀式。
首先要找師傅揀個好日子，之後就要聯絡相熟嘅當舖，特別係負責儀式嘅大掌櫃，事前飲茶灌水自然唔少得。到咗典當當日，當舖神樓要上香供果，好似做節時咁大陣仗，吉時一到，父母就會把小孩送到當舖，然後從櫃枱左邊小窗口送上嬰兒，朝奉接下後象徵式檢查一下，之後點頭表示一切正常，隨即抱着嬰兒向神樓祈福，再喺用紅紙造成嘅假當票蓋上公司印，再由朝奉寫上「基根長養，快高長大」之類嘅字句，然後由右邊小窗遞交回嬰兒父母，儀式便大功告成。之後當舖上下都會收到紅包，而朝奉更係大大封啦！
撰文：小德