講起當舖，澳門最老字號嘅有3間，分別係人昌押、德生按同德成按，3間都有近百年歷史，可謂見證住澳門典當業嘅興衰。3間當舖先後結業，位於大馬路嘅德成按，90年代結業後，被政府列為古蹟，改建為「典當業展示館」，可惜近年遭業主瘋狂加租，最後活化機構頂唔住貴租，德成押被業主收回，最後會唔會被拆，現時仍係未知之數。至於位於白眼塘的人昌押，建於1865年，係座有7層高碉樓嘅當舖，原為何老貴嘅物業，自60年代結業一直丟空，淪為道友開餐飯堂，2000年8月31日一場大火，令大樓倒塌，現被圍板圍住等候拆卸。至於位於十月初五街嘅德生按，上世紀80年代已經停業，冇被政府保育，亦冇被閒人佔據，據講其創辦人係由澳門被賣豬仔去外國打工嘅華僑，老時落葉歸根，返嚟澳門做當舖生意，後來轉售畀押業大王高可寧，由於地處十月初五街，頗受附近一帶嘅妓女歡迎，所以被街坊匿稱為「雞按」！