講開當舖，原來妓院老闆娘亦同當舖關係密切，經常來往，事關當年啲公子哥兒去妓院尋歡作樂，好多時都會帶唔夠現金，於是就會將身上嘅貴重嘢攞嚟抵押，換錢飲酒作樂，但妓院老闆娘就算老江湖，都唔可以認識晒所有貴重物品，最好嘅方法就係第一時間派人去當舖「問價」。當舖掌櫃攞上手一望，再報價嘅時候，呢個數就叫做「公價」，就算客人話物件值一千大洋，而掌櫃話值一百，就只能當一百，所以妓院生意興旺嘅話，一晚要搵二叔公幾次咁多。而當中亦有啲例外，就係掌櫃話值一百，但來人話物品係某某公子或某某大人物時，掌櫃就會酌量提高金額，一般都押到原價七成，當然呢種優惠唔係人人都有，喺澳門街冇啲江湖地位都享受唔到。