九十年代初期，日本寫真集漸漸於本土興起，當時最多人睇嘅當然係宮澤里惠啦！除咗佢之外，亦有一位女優嘅寫真集令萬千男士為之熱血沸騰，佢就係武田久美子喇！呢位經典艷星拍嘅寫真集固然一流，而佢拍嘅艷情片同樣令人留下深刻印象。
各地藝能界當中，有好多明星都係由童星做起，以日本為例，安達祐實就係成功例子之一，另外赤西涼以及優希真琴都係童星出身，不過後來轉去拍AV。此外，一代妖姬武田久美子亦係一名童星。久美子1968年出生於日本靜岡縣，讀緊小學四年級嘅時候就由父母帶去應徵做童星，後來仲同佢細佬一齊拍過嬰兒用品嘅電視廣告添。到久美子就讀初中，參加一個由東京大學主辦嘅偶像選舉，由東大學生投票選為冠軍，人氣漸漸上升，更開始參演電影。第一部電影作品就係《16至19歲的青少年•Boogie》，當中唔單只給予久美子榮登大銀幕嘅機會，戲中仲有一幕同近藤真彥錫錫嘅戲份。不過，事後久美子就被近藤真彥班粉絲痛斥，更收到恐嚇電話以及藏有刀片嘅恐嚇信，幸好最後久美子都係平安無事。
拍完戲之後，久美子仲做埋歌手，成績尚算理想。到漸漸長大，醞釀出一股濃烈女人味，其又圓又大嘅電眼，濃密嘅黑色秀髮以及眉毛，為其美貌添上獨特魅力。此外，一副34-23-34豐滿又婀娜嘅身材火辣過人，最重要仲係佢絕不收收埋埋，拍過唔少全裸露毛寫真。雖然當中嘅演出唔算大膽，但係久美子冷艷又妖冶嘅風格散發出一種攝人魔力，令廣大男兒着迷，成為一代日本性感女神。
久美子除咗拍寫真盡情裸露，拍戲一樣敢露，《Zero WOMAN III 警視廳0課之女》、《卍舞2 妖艶三女濡濕繪卷》以及《花房亂愛》都係其代表作，而喺《花》片當中嘅演出更為一絕，極盡誘惑之能事。當中久美子扮演一名性感歌姬，之不過佢外表係女人，但實質上係變性人，面對男主角就千嬌百媚，同女配角發生關係卻又表現出一股剛陽之氣，演技收放自如，勁！
撰文：賢