內地或者南韓有好多以性感走紅嘅車模，有時要佢哋着多件衫，玩吓時尚造型，點知一着衫就光芒褪色，連殺氣都冇埋，而能夠性感時性感，時尚時時尚，可以話認真難得，而南韓名模陸智慧就係其中一個！
陸智慧今年31歲，出道十多年，至今仍然十分活躍，見到佢身影嘅地方，除咗車場、車展外，仲連時裝界同埋電玩界都十分吃得開。今年南韓嘅電玩展，就見到佢替某大遊戲生產商做代言。講番智慧當年，書都未讀完就跟朋友跑車場，做賽車女郎期間，由於表情多多，所以深受龍友歡迎，之後曾打算轉戰影視界，但發展一直未如理想，於是重回模特兒界打拚，並深明單靠性感，好難持續發展。上圍擁有35吋嘅智慧，樣子甜美，身材玲瓏浮凸，講真單賣性感都有排賣，點解咁樣部署呢？有傳話佢勇闖影視圈時，遭劇組人員揶揄為花瓶，於是的起心肝改變自己。
智慧回歸，先做番車模，由於有多年經驗，所以絕對得心應手，期間獲得大大小小嘅獎項無數，同時以性感火辣形象殺入電玩界，多年來代言過不少網絡同電腦遊戲，而經過秘密練兵後，佢開始放風話要拍時裝照，起初都有攝影師擔心，智慧一向性感，要佢着得密密實實，會唔會冇晒殺氣呢？但由於智慧嘅人氣同知名度一直高企，要游說老闆用佢唔難，只擔心出嚟效果，點知出嚟嘅效果一流，能夠把時裝嘅特色充分彰顯，同時亦帶出智慧嘅個人獨特風格，自此智慧性感同時尚兩邊兼顧，工作不斷，令佢到今時今日仍然屹立不倒！
簡介：呢個網頁收錄咗陸智慧近三百張寫真，出道到今時今日都有，見證住陸智慧成長同蛻變，而且當中不乏性感照，值得捧場！
網址：http://myfavorites.jonai.net/Korean/Yook_Ji-Hye/index.html
出生地：南韓
三圍：35-24-35
身高：172cm
撰文：龍四海