好多人都話家陣香港嘅後生仔抗壓能力極低，面對學業、感情或事業上嘅失敗，好容易自暴自棄。喺日本，吉川友雖然做唔成魔靈娘，最近仲同兩個男人搞埋一齊，但就絕對唔係面對唔到壓力，而係為咗尋找新出路。
日本藝能界比起香港嘅多姿多采得多，就以女歌手為例，香港嘅女歌手唱得好聽嘅已經唔多，當中仲要擁有美貌與好身材嘅更係少之又少。相反，日本女歌手好多都唱得又演得，樣靚之餘身材仲正得交關，所以幕前演出除咗表演歌舞，亦不時露一露身材增添娛樂性同養眼度，好似倖田來未、椎名林檎就係好例子，而吉川友亦係其中之一。今年只係21歲嘅吉川友青春俏麗，活潑可人，同時又帶住清麗脫俗嘅優雅氣質，故此被日本藝能界稱為整潔美人歌手。聽到友妹係女歌手，大家唔好以為冇機會欣賞到佢嘅身材喎！友妹同好多日本女藝人咁向多方面發展，唱歌係主要，但係一樣會拍水着寫真。咁又啱，如果唔係友妹呢副雪白滑溜嘅33C-23-33胴體冇得畀大家欣賞，就真係浪費晒喇！
吉川友現時主要以歌手身份登台演出，偶有拍攝性感水着寫真騷身材，據聞其歌唱天分甚高亦備受認同，所以喺日本樂壇能夠站穩一席位，更加有一個官方成立嘅吉川友支援組添。不過，友妹初出道嘅時候其實唔多平坦。2007年，友妹當時15歲，睇電視見到美少女組合魔靈娘嘅演出，被同齡嘅魔靈娘久住小春嘅魅力所吸引，決心加入團隊。但係，友妹參加魔靈娘嘅招募面試落選收場，幸好後來就被藝能事務所發掘到，仲請佢加入另一個美少女組合「Hello！Project」。由於友妹表現優秀，深受事務所賞識，更加安排佢同偶像久住小春以及北原紗彌香組成「MilkyWay」出碟兼登台。到2010年，友妹脫離組合作個人發展，2011年更加成功爭取到主演電影《契機就是YOU！》嘅機會，仲一手一腳主唱埋主題曲添！今年年中，一向都冇緋聞嘅友妹突然同兩個男人發生關係！咁大件事？唔係畀人影到佢哋玩3P啩？其實係友妹決定同二人男子歌唱組合「自由音樂」，變身成為新組合「來吧戀」，所以家陣友妹登台演出都離唔開兩位男隊友。
簡介：吉川友成為人氣女歌手，唱片公司特別為佢設立專屬網站，上面有吉川友嘅最新消息以及演出嘅音樂錄像片段，想聽到阿妹嘅好歌喉又想見到佢嘅俏麗美貌，就唔好錯過喇！
網址：http://www.kikkawayou.com/
年齡：21歲
身高：5呎4吋
三圍：33C-23-33
撰文：賢