講到妓院其中一條禁忌，就係「攞錯毛巾拎錯盆」，呢條禁忌要注意嘅係妓院嘅雜工，因為當年冇紙巾，所以抹乜嘢都要用毛巾，而為免出錯，每抹一樣東西，佢哋就會安排一種毛巾，例如客人有抹手巾同抹面巾，當中仲有冷熱之分，天時暑熱就攞冷巾，天寒地凍就攞熱巾，之後入房再送上香巾，食飯時又有餐巾。當時嘅妓院係冇浴室沖涼，所以小姐替客人用毛巾抹身，及完事後用作清理嘅事後巾，全都有規有矩，一搞錯就大件事，雜工阿姨除咗要分清毛巾種類，幾時攞邊種毛巾，亦唔可以出錯。至於盆就係面盆，以前青樓冇自來水，小姐只可以用面盆盛水替客人抹身洗腳，完事後阿姨更要打兩盆水，一盆畀客人，一盆畀小姐專用，而小姐嘅面盆不能搞錯，因為清潔私處，涉衞生問題，搞錯則後果嚴重！