我老友最喜歡食粟米斑塊，佢話斑塊大大件兼且啖啖肉，要嚟送飯認真一流。一般斑塊所用嘅都係龍脷柳，龍脷柳亦分好幾個等級，用中等以上嘅魚香特濃，咬落質感分明，一般酒店或大餐廳才會用。日前喺金池桑拿沖完涼，出嚟問大廚有乜嘢好食？佢推介咗個最普通嘅「香草粟米斑塊」畀我，於是就叫佢整個嚟試吓！一嚟到就聞到粟米濃香仲有淡淡雞蛋香味，再咬啖斑塊，可以話完美配合，魚鮮、蛋香、粟米味三合一，再o趙多兩啖，仲有幽幽嘅香草味，原來腌魚柳時加了少少香草，除咗可以去腥，仲可以誘發魚油嘅香味，令人回味無窮。再問師傅啲斑塊做乜咁正？佢話入咗批靚貨，於是落足心機整，講真真係有星級酒店嘅味道呀！