近年韓風文化席捲全世界，連潮流文化嘅老大哥日本都飽受衝擊。但南韓仍有不少藝人喜歡日系風格，好似今日要介紹嘅名模徐真兒，佢出道以嚟都保持日系形象，超卡娃依呢！
1984年出生嘅徐真兒，出道快近十年，初期都做過賽車女郎，但日曬雨淋嘅時間好短，好快就轉型做歌手，仲參加過女子組合。想當年囡囡只要樣靚身材好，兼且識跳吓舞，全都畀唱片公司搵去做女子組合，有兩個人組成，但亦有幾十人一組，真兒就係其中一個大組別，但玩咗幾年，發覺唔太適合自己，所以決定退出。由於真兒樣子甜美，身材出眾，一直深受攝影師嘅歡迎，退役後廣告同雜誌工作不斷，於是以模特兒身份繼續喺娛樂圈發展，多年來一直默默耕耘，總算闖出名堂，成為十大人氣模特兒，粉絲人數不斷上升。
睇番真兒嘅照片，多年來都保持住長金髮同埋喺髮尾電大圈圈嘅形象，有時再配埋誇張嘅指甲造型，日系風格極濃，至於化妝方面，真兒都係以日系淡妝為主，較重色彩配搭，唔似其他南韓女星咁係唔係都把眼睛畫到黑黑咁樣。真兒外形別具一格，反而得到更多粉絲嘅支持，而且近年興網絡遊戲，真兒出晒名係宅女，係遊戲都話好玩，自然吸引廠商搵佢代言或者做宣傳。至於車模工作，家陣就以台柱身份壓陣，好似今年首爾車展，佢一出場就震撼全部記者同龍友，去到邊都圍住佢嚟轉，絕對魅力無限，以咁嘅走勢，睇嚟真兒喺當地仲有排紅呀！
簡介：徐真兒出道多年，但流傳嘅照片就唔係咁多，只有幾百張，九成都收錄晒喺呢個網頁，算係最齊全嘅照片庫，不妨瀏覽一下！
網址：http://myfavorites.jonai.net/Korean/Seo_Jin-Ah/index.html
出生地：南韓
三 圍：34-24-35
身 高：170cm
撰文：龍四海