裸女賣棺材

好多傳統行業,傳到第二代,都會進行一啲革新,而今日要介紹嘅大改革,最後成唔成功仲未知道,但對網友宅男嚟講,就絕對係天大好事。話說波蘭有間專賣棺材嘅老店,近年由第二代接手,進行咗一系列嘅大改革,其中最大膽係搵嚟超索模特兒跟自家出售嘅棺材嚟個Crossover,拍咗一輯性感月曆,希望畀人覺得生老病死都係自然現象,毋須有恐怖感覺,據講推出反應超乎想像,所以小老闆更加多兩錢肉緊,當中不少畫面嘅模特兒都要露點示人,表示要突破禁忌。最後會否成功真係未知數,但網友們就已經把艷照火速轉貼,大讚照片夠大膽前衞。

撰文:小德

街頭比堅尼瑜伽

平時喺街見到穿着低胸衫或超短迷你裙索女,已經吸引到唔少男士投以注目禮,若然見到火辣比堅尼索女,兼喺度大玩劈腿一字馬、彎腰倒奶時,男士咪睇到失晒魂?早前新加坡有兩名身穿火辣比堅尼嘅索女,喺街頭大玩劈腿動作,唔單止吸引男士圍觀,更紛紛舉機影相。起初以為兩位索女想出位,查實佢哋原來係為新開張嘅瑜伽教室進行街頭宣傳。據其中一位女教練表示,同合作夥伴喺街頭做瑜伽,目的係想帶出喺邊度都可以練瑜伽嘅新概念,除街頭外,亦先後喺海岸公園、植物園等地方表演。雖然性感裝束惹嚟熱議,但唔會令佢哋覺得尷尬,更對宣傳效果表示滿意添!

撰文:魂

磨胸籌款得個吉

以活動方式進行嘅籌款活動多不勝數,只係搞完活動後,卻被相關嘅慈善團體拒收捐款都咪話唔﹝火羅﹞!由三名專門喺網上教男性如何同女性相處嘅男性團體「Simple Pickup」,早前搞咗個「磨胸籌款」活動,每位被訪女性如果獲允許佢哋其中一人喺胸部上磨嚟磨去嘅話,就會捐出20美金,並將所有捐款全數捐畀「乳癌研究基金會」。經過一日嘅募捐活動後,佢哋順利說服百幾名女士,並總共捐出2,080美元(即約16,224港元),點知基金會卻以考慮到基金服務對象感受而謝絕,搞到家陣3位男士廣求點樣運用呢筆捐款嘅方法。

撰文:魂

車展女模又露點

近年內地嘅車展幾乎同露點、走光等名詞扯上關係,皆因差唔多每次車展,都會有車模大玩走光,或以超性感造型博出位,好似啱啱舉辦完嘅第14屆武漢車展咁,又有一位車模嚟個露點誘惑。話說車展進行到第三日時,有位屬於某進口汽車品牌車模,喺展場內露點擺甫士,結果吸引到大量嘅龍友同男士圍睹其性感風姿。當然,如此哄動嘅舉動,自然引嚟其他車模嘅不滿,甚至有人對此進行譴責。有網友表示縱然有關部門曾推出所謂「限裸令」,但相關情況仍時有發生,甚至有網友覺得家陣嘅車展,焦點唔再係車輛銷售額,車模先至係車展嘅主角。

撰文:魂