近十年影視界都似乎冇乜出過「武打女星」，事關練功夫真係唔容易，加上做得明星除咗識打之外，仲要樣子見得吓人，最近內地就出現一個被喻為新一代武打女星嘅演員，佢就係王智，咪睇佢外表斯斯文文，原來7歲時已開始習武。
嚟自遼寧嘅王智，自小就好好動，7歲時見到武館門口一班哥哥姊姊喺度耍刀舞劍，佢就要學埋一份，據講佢嘅童年，日日走去武館練功，比啲大人仲要勤力，所以基本功打得好好，到咗高中時，見人哋跳舞好睇，又轉咗去學舞，一學就7年，古今中外嘅舞蹈都難佢唔倒，直至考入中央戲劇學院表演系，佢又將全副精神放喺表演藝術上，所以一畢業，就已經有製作公司向佢招手，雖然起初都係小角色，但王智珍惜每個機會，經過三四年嘅磨練，直至2011年在劇集《馬永貞》中飾演馬素貞，其中有不少動作場面都親身上陣，令佢一炮而紅。
之後更有份參演黃曉明主演嘅《精忠岳飛》同謝霆鋒主演嘅《奇迹》劇集，有一級演員助陣，王智人氣自然大升，加上動作難度愈嚟愈高，佢都能一一應付，所以有媒體就將佢捧為新一代武打女星。王智得知後，覺得呢個名銜責任好重，不過佢話對武打動作好有信心，但唯一缺點就係唔忍得笑，一認真時就會笑，經常令導演十分頭痛。此外，較早前王智為咗演日本女特務嘅角色，仲努力學日語同騎馬，家陣日文講到勒勒聲，要去日本發展都冇問題，所以一個人想成功，就要不斷學習，好似王智咁，將來想唔紅都幾難！
簡介：由於王智係專業演員，所以拍照唔多，要睇佢嘅寫真或者自拍，就要上佢嘅官方微博，裏面很多王智嘅照片，值得捧場。
網址：http://weibo.com/kungfuangel
出生地：遼寧
三圍：34-24-35
身高：166cm
撰文：龍四海