每日營營役役，辛辛苦苦打工賺錢，有時真係唔知為乜。另一方面，唔少人為咗爭名逐利， 仲要同其他人拚個你死我活，期間明槍暗箭出齊，但係事後爭得到又點？可能會發覺得到同失去嘅一樣咁多。荷里活情色片《艷舞女郎》當中嘅女主角相信亦有此感想。
《艷》片講述，由Elizabeth Berkley飾演嘅露咪，自覺已經可以獨立，並發覺自己唔想困喺自小就居住嘅小城鎮當中，於是就獨自一人由鄉下去到賭城拉斯維加斯搵食，不過就唔係以賭維生亦唔係靠做老千，而係利用佢婀娜多姿又鮮嫩嘅胴體跳艷舞。令露咪變身為艷舞女郎嘅機遇，係佢從鄉下去到賭城，一落車就畀人偷走行李，喺佢又心急又無助嘅時候就遇到艷舞表演團嘅化妝師，佢見露咪咁可憐就招呼佢到艷舞團休息至再作打算。此時，艷舞團中嘅王牌舞孃克里斯蒂見到露咪甚有姿色，仲知道佢曾經習舞，於是就游說露咪做舞孃。雖然露咪覺得跳艷舞唔係咁光彩，而且唔甘心被男人視為玩物，但係又想成名搵大錢，內心一輪掙扎之後終於答應。露咪肯學又擁有驕人嘅天賦本錢，好快就闖出名堂。
不過，露咪仲未滿足，變得愈來愈貪心，仲色誘埋艷舞團中嘅娛樂總監。原來同克里斯蒂有一手嘅總監，見露咪青春可人，見到佢主動獻身就梗係食得唔好嘥啦！成功取代克里斯蒂成為艷舞團王牌之後，露咪更加用激烈手段對付意見不合嘅同事。不過，到最後露咪卻發現即使成為一代艷舞巨星，期間喺眾人心目中依然係男人嘅玩物，於是突然從事業高峰中引退，離開賭城他去。
《艷》片嘅劇情就冇乜特別，但係大家都唔使研究同探索咁多喇，因為片中充滿裸露鏡頭，而除咗青春活潑，胴體誘人無比嘅女主角Elizabeth Berkley大跳全裸艷舞極為誘人之外，其他二打六舞孃一樣睇頭十足，甚至可以用肉體橫流嚟形容。
撰文：賢