加拿大卑詩省有個好漂亮嘅海灘，叫做「沉船灣」，佢哋每年7月左右都會舉辦天體跑步活動，希望藉此宣傳天體運動，兼可以籌錢護理海灘嘅大小設施，近年多咗華裔移民參加呢項活動，麻煩事亦隨之而來。
已經有十六年歷史嘅「沉船灣天體跑步活動」，今年吸引百多人報名參加，有唔少人係嚟自其他國家，包括美國、澳洲等，華人面孔亦有不少，佢哋一絲不掛咁跑大約五公里，一般正常人跑步，三、四十分鐘就可以完成，老人家可以選擇慢跑或散步咁嚟完成。前幾年嘅參加人數更接近幾百人，原因就係多好多華裔移民參加，而且大多數都全家出席，所以報名人數大增，現場氣氛不知幾咁高漲，就連籌款數字都上升不少！點解今年只得百多人參加，落差咁大？
多咗華裔移民參加，活動辦起嚟又真係熱鬧好多，但同時又多咗好多問題。由於冇規定唔畀親友或贊助者嚟現場打氣，所以大批華裔親友湊熱鬧，佢哋嚟到靜靜地企埋一邊睇都冇問題，但去到現場竟高談闊論，指手畫腳，人家看見裸體一面淡然，但佢哋淫笑兼評頭品足，確實會令唔少參賽者反感，據講曾經發生爭吵事件添，大會無奈定下一些行政手段，減少圍觀人數，亦因此令參與活動人數大減。
撰文：小德