根據澳門史料記載，獲政府發牌嘅公娼館，就叫做妓院，冇領牌嘅私娼館，就叫做「躉館」。點解叫做躉館呢？唔通呢度連個「躉」都有得賣！大家千祈咪諗錯，躉館嘅規模，其實同有牌嘅妓院一樣，有齊各級妓女，唱說彈吹，樣樣皆精，分別只係有牌同冇牌，為咗避免同一啲低級嘅妓寨混淆，所以就稱為躉館。望文生義，「躉」有整批、齊備嘅意思，所以躉館就係乜嘢囡囡、乜嘢服務都有嘅地方。澳門當時嘅有牌妓院，大多數喺福隆三街一帶，而附近嘅墳地圍、新市巷同蓬萊新街等，就係躉館嘅所在地，位置係有啲偏僻，但由於唔使納稅，所以價錢比妓院平好多。據啲老街坊講，妓院嘅妓女要出局陪客，有好多繁文縟節，為咗保持營業額，每晚都要留一定數目囡囡喺度，但躉館嘅囡囡，就可以隨時接走，一個不留都冇問題！