做男人千祈唔好拖泥帶水，做事有頭冇尾，特別係處理感情事，一單還一單，咪一腳踏兩船又或者搞婚外情，因為好多例子都話畀我哋知，就算呢段婚外情幾咁激情幾咁過癮都好，都難以取得美滿結局，日本情色片中嘅經典之作《失樂園》可以作一參考。
《失》片講述男主角久木祥一郎，係一位年約五十多歲嘅雜誌社編輯，佢老婆則係同社嘅美術部職員，兩人有個從事醫護工作嘅女兒，生活平平淡淡，冇乜激情可言。某日祥一郎就結識到業餘書法教師松原凜子（黑木瞳飾演）。呢位三十幾歲嘅人妻，下嫁一個木訥寡言嘅醫生老公，多年來相處平淡如水，搞到凜子成日都覺得空虛寂寞，自認識到祥一郎之後卻感受到戀愛嘅甜蜜。之後，二人約會愈來愈多，感情漸漸失控，更加將各自嘅另一半都拋諸腦後。
二人嘅感情隨住激情過後而不斷升溫，令佢哋冷淡對待自己嘅家庭。後來，佢哋嘅另一半都知道二人嘅出軌行為，祥一郎嘅老婆忍無可忍底下決意離婚，至於凜子嘅老公則寫信到祥一郎嘅公司，告發佢勾引良家婦女。祥一郎面對公司譴責，寧願連事業都放棄埋。
最後，祥一郎同凜子於大雪紛飛嘅天氣下，去到一間木屋，齊齊飲毒酒，然後攬住一齊死。片中嘅床戲拍得細膩又唯美，刺激官能之餘又讓觀眾感受到男女主角嘅情感解放，手法一流。至女主角黑木瞳端莊又柔情似水，床戰時表現得極為享受，煞是誘人。戲中佢有一句說話：「我只是愛上一個我真正愛的人，難道這就叫做外遇嗎？」對與錯就由你決定吧！
撰文：賢