大家過澳門經常去嘅手信街一帶，原來以前係海嚟o架！話說百幾年前，澳門北灣即係家陣內港嗰邊，有三個主要嘅避風塘，分別係白沙塘、爐石塘同白眼塘。白眼塘嘅面積最大，即係家陣福隆下街至蓬萊新巷到深巷橫街一帶，由於水深港闊，停泊咗好多漁船，但喺清嘉慶年間，有船因失火釀成重大事故，之後有商人建議開徵船泊稅來監管船隻停泊，由於商人願意每年畀二百両黃金政府，於是澳門政府就將管理稅收嘅權力交畀呢位商人，自此船隻停泊就要抽稅，原本免租免稅嘅船民就要想辦法搵錢，於是就引用廣州荔灣嘅特色，喺白眼塘設置花舫，畀尋花問柳客多一個消費途徑，花舫有兩種，一種只提供性服務，客人看中「艇妹」，就可以上船進行交易，另一種係設廳局，客人要先上酒菜，再點歌女樂師，同去大妓院或上酒樓一樣，客人飲飽食醉後至入房，同「艇花」春宵一刻，「艇妹」收費較平，十文八文錢就可以，至於「艇花」就要以十両八両起計。只可惜喺1868年填海，乜艇都冇晒！