對部分裸體愛好者嚟講，雖然裸泳已經夠晒自由自在，但係始終及唔上裸潛，讓全身浸喺海水，同魚群一齊潛水咁過癮。如果想潛得夠自「游」，又想欣賞美妙嘅海底勝景嘅話，究竟去邊度好呢？美國就有旅遊網站精選咗三個各具特色嘅裸潛勝地，讓好此道者過足癮！
Formentera位於西班牙最南部嘅巴利阿里群島，呢個地方有個被譽為全地中海最幼滑嘅海灘，據講呢個海灘啲沙滑到好似沐浴露咁，認真厲害！不過作為一個裸潛嘅最佳選擇，佢當然唔只水清沙幼咁簡單啦！和暖嘅地中海加冰凍嘅大西洋兩種唔同水流交匯下，讓當地擁有豐富又多姿多采嘅水底世界，滿足一眾夢想能同魚群同游嘅裸潛愛好者。
單係從Paradise Beach個名，就知道呢度嘅風光好似天堂咁靚，而佢更有另一個名，就係叫做愛的海灘。意思梗唔係話啲人好鍾意喺度做愛啦！而係指呢度係情侶拍拖嘅熱點。不過，原來佢除咗吸引情侶嚟玩外，更係裸潛愛好者嘅勝地。事關呢度水溫適中，加上水流一啲都唔湍急，最重要係呢度裸體風氣相當盛，因此每年都吸引唔少裸潛愛好者慕名而至。
位於印屬安達曼尼科巴群島上嘅Radha Nagar，聲稱擁有全亞洲最靚嘅海灘。咪以為佢只係大口氣喎！皆因呢個海灘擁有白淨無瑕嘅細沙，仲有既藍又清澈嘅海水，加上附近為數唔少嘅珊瑚礁同珊瑚魚，確係引人入性。雖然呢度裸潛真係冇得彈，但大家要小心因為呢度水流比較亂同急，如果想潛得開心又放心嘅話，最好就係先搵個熟悉當地水流兼潛水經驗豐富嘅人帶路，跟住再裸潛先喇！
撰文：魂