大隻廣：#v#：最近特首真係頭痕，畀審計處踢爆佢外遊時，好多時都住酒店嘅總統套房，佢就開心快樂，但就要香港巿民嚟埋單。其實酒店嘅總統套房有乜嘢好住？兩公婆住幾千呎，被人劏咗都冇人知，換轉係我，外面有少少聲音，都成晚瞓唔着。
大口環：＊o＊：兩個人住幾千呎，真係要一不怕鬼神，二不怕賊匪，何況出國公幹，有時會同啲有頭有面嘅大粒佬見面，只住啲三星客房，真係會畀人笑到面黃。
大聲婆：$o$：我覺得住總統套房好小事啫，假如佢喺房內開無遮派對，晚晚與當地美女夜夜笙歌，到時咪仲大件事！
大圈明：＊o＊：我都住過總統套房，真係太大啦！第一次一個人住，無所事事，唔知自己喺度做乜，第二次帶埋女朋友入去，單係喺大廳玩捉迷藏，都玩到筋疲力盡，之後上床都冇晒力，第三次一家五六個人去住，但都係用唔晒啲設施，所以總統套房唔係人人都住得。