知情色趣：出差交歡索工傷

香港勞工受到工傷條例保障，而保障程度都可謂相當完善，例如老闆叫下屬幫佢去乾洗店取回衣服，期間意外受傷，亦可以循工傷方向追討賠償。不過，如果期間下屬同伴侶交歡，又意外受傷，又有冇得賠呢？喺香港就唔多清楚，但係喺澳洲就可以，當真？2007年嘅時候，一名澳洲女性同男友揸車外出公幹，中途去到一間汽車酒店留宿，期間梗係少不免做愛做的事啦。激戰之時，酒店房內天花板上嘅燈飾突然跌落嚟，仲擊中女方令佢受傷。之後，女方就向老闆索取工傷賠償，案件審到本月21日，裁判官就裁定女方可以得到賠償，原因係做愛屬於生活嘅一部分，如果被燈飾擊中嘅時候女方同男方玩緊啤牌，大家都會覺得佢可以得到賠償，點解做愛又唔得喎！呢個比喻又真係幾好喎。