陳因儉：最近又有五位日本AV女優到內地出席活動，乘機掘金，呢個情況睇嚟將會愈嚟愈嚴重，話說今次出席上海成人用品展嘅女優，由兩位阿姐級嘅女優領軍，分別係波多野結衣同埋橫山美雪，再帶領三個小師妹出席，負責單位認真大陣仗，視為巨星級招待，所以佢哋嚟一次內地，唔好話賺到大錢，連彩都攞埋，難怪佢哋嚟完一個接一個，而且橫山美雪仲已經嚟過幾次添，睇嚟真係想長時間在內地發展。
謝就南：梗係啦！好似佢哋嘅前輩蒼井空咁，早喺2010年先喺網上拋眉弄眼，鼓勵網友關注，搞到一日內升至有22萬人關注，唔少內地人仲為咗關注佢，要翻牆出國上網，聲勢一時無兩，之後到咗2011年就挾雷霆萬鈞之勢，順利登陸內地發展，家陣更榮升騷后，無論商場騷、樓盤騷、派對騷，首映騷等，啲老闆都想佢大駕光臨，而且叫價唔比港星便宜，但仍然絡繹不絕，大把人爭住搵佢，賺到盆滿缽滿。
網香香：但真係好奇怪，內地人對日本AV女優，應該冇乜認識，就算坊間有鹹片暗地出售，但啲碟面都係亂嚟嘅，所以裏面赤條條嘅女優，究竟係邊個，相信好多人都唔識，好似早排蒼井空最紅嘅時候，當時所有女優嘅作品都貼晒蒼井空嘅大頭落去，有人以為吉沢明步、小澤瑪利亞就係蒼井空，仲誓神劈願話蒼井係微乳系或者係混血兒，真係畀佢哋激死，但既然一無所知，女優喺內地咁受歡迎又點解釋呢？
非力普：可能喺網上嘅關係啩！家陣啲人為咗睇鹹片，冒險畀人拉都要翻牆，可謂在所不惜，所以點都認識到一兩個心水女優，平時只可以遠觀，家陣就可以近觀，所以只要女優所到之處，都會有大批粉絲到場，但奇怪嘅係啲大公司老闆同高層，照計唔會成日上網睇鹹片，所以一定唔會係佢哋嘅粉絲，但都咁樂於邀請佢哋出席大小活動，唔通佢哋別有用心，真係有啲蠱惑，呢層真係問吓佢哋至知啦！