大家閒來嘅時候，應該都會約三五知己落酒吧，一邊飲啤酒，一邊傾閒偈喇！部分酒吧仲會提供唔少節目畀大家，例如擲飛鏢、桌球以及卡拉OK。嫌呢幾樣玩意都普通過頭？咁樣大家可以去美國洛杉磯一間叫做Drink and Draw嘅酒吧玩吓喇。呢間酒吧最近推出咗一個別開生面嘅節目，就係繪畫喇，而且仲係繪畫裸女圖添！酒吧每星期四晚上八點，就會邀請裸模上陣，等酒客可以一邊嗒酒，一邊繪畫，相信呢杯酒一定滋味無窮啫。
小弟身邊愈來愈多朋友榮升父親，見到佢哋對住個小朋友笑容滿面，被逗得歡天喜地，搞到我都不知幾想置頭家，生番個BB。不過，有一份外國研究報告就指出，男人做咗爸爸之後，體內嘅賀爾蒙──睾丸酮素就會隨之下降，而呢種賀爾蒙如果水準愈高，就愈有男人味，下降則當然會大為減弱。然而，大家又唔使驚睾丸酮素下降令性能力削弱，因為專家話冇影響，而且處於較低水平，可以預防部分慢性疾病，因此大家唔需要勒住自己唔傳宗接代。撰文：小德