內地有好多不法商人，佢哋唔單只製造黑心食品，仲經常造出山寨產品，大家如果上網睇過由網友製作嘅內地山寨產品特輯，一定被佢哋嘅「誠意」嚇一跳，然後笑到肚痛。最近日本超人氣少女組合AKB48亦不能幸免，因為內地又出咗一個山寨版女子組合，名為AK98，佢哋除咗一樣咁大堆頭，仲同樣青春活潑又可愛添！真係服咗內地人嘅複製能力喇。
由於電玩遊戲市場龐大，為咗吸金，好多遊戲開發商宣傳嘅時候都無所不用其極，而近年最常用嘅招數，就係出動索女吸引以男性為主嘅玩家群喇！一般嚟講，班索女都只係以性感打扮出現於遊戲展行行企企，最多同機迷合照一下。不過，最近嘅東京遊戲展就唔同喇。因為場內居然有幫iPad遊戲「CoinFalls忍」嘅性感女忍者，大跳令人噴血嘅鋼管舞。班索爆女忍者跳完舞之後，仲邀請台下觀眾上台玩遊戲，令現場氣氛急升到最高點。如果香港嘅遊戲開發商可以照辦煮碗，一定大收旺場啫。
撰文：賢