我哋中國人一向都相信以形補形呢個醫學理論，例如食外形似大腦嘅核桃可以補腦，又或者食豬肺可以補肺，諸如此類。不過，美國即將舉行嘅一個特殊節日就話畀大家知，原來美國人亦深信此道理，一樣會為咗壯陽催情而喪食牛睾丸！
世界各地好多地方都會大搞美食節，好似我哋香港咁，美食亦有好多。不過，眾多美食節都係集世界美食於一身，甚少單以一種食物作為主題。而美國蒙大拿州嘅一個節日就唔同喇，因為佢哋於節日內只係推廣食牛睾丸！大家冇睇錯，小弟我亦冇打錯字，可能大家又會問，美國人唔係最怕食內臟咩？點解又會突然對牛睾丸情有獨鍾呢？牛睾丸節有多年歷史，將於八月三號至七號舉行嘅已經係第二十九屆。據講多年前蒙大拿州有好多牛仔，由於佢哋居於偏遠山區，所以一向生活都相當節儉，對飼養嘅牲畜總會物盡其用，因此佢哋將公牛去勢之後，覺得將牛睾丸隨便丟棄，實屬浪費，所以就將牛睾丸酥炸嚟享用，並將此美食稱為「洛磯山的生蠔」以及「牛仔們的魚子醬」，意思就係表示牛睾丸嘅壯陽作用媲美上述兩種被公認嘅壯陽美食。
牛睾丸節嘅始創人Rod Lincoln就表示，撇開壯陽效果唔講，酥炸後嘅牛睾丸其實味道一流，而且百分百冇骨，就營養而言，牛睾丸有百分之七十係蛋白質，營養夠晒豐富。喺牛睾丸節期間除咗有大量酥炸牛睾丸供應之外，為期五日嘅節日當中，仲有大量遊戲供遊客玩樂，因此幾乎每年都吸引到超過一萬人一齊狂歡盡興。不過，與其話盡興，不如話盡「性」至啱，事關眾多遊戲之中，有唔少都鹹鹹趣趣，例如係濕衫大賽，比賽只接受女性參加者，她們只准穿着一件T恤上台，不過記住要真空上陣。上到台之後，參加者就要當住下面上千名觀眾嘅面前，被主持人噴水濕身。淋到濕晒嘅同時，參加者可以自我發揮，例如係自摸，或者直接剝埋件衫，讓雙峰盡現，總之就以搞興台下觀眾為主要目的。
除咗濕衫大賽之外，節日亦有人體彩繪比賽，男男女女剝光豬再塗上顏料爭妍鬥麗；咬牛睾丸賽車，就要參加者一邊揸三輪車，追咬被吊高嘅牛睾丸，咬中有獎；油脂摔角大賽，就係畀女參加者於滿布油脂嘅吹氣泳池當中互相搏鬥，不時玩到扯爛衫褲，夠晒激呀；而星期三晚就係女士無褲着之夜，當晚女士如果赤裸下身，將會有贈飲一杯。上述嘅遊戲只係其中一小部分，此外，節日當中不停有派對舉行，實行由朝玩到晚。可能就係派對離不開酒精，所以參加者由日飲到夜，加上牛睾丸可能真有催情效果，令佢哋玩到亂晒性，隨處露體都只係小事，有唔少男女仲隨處交歡，真係唔怕畀人拉喎！
撰文：賢