喺內地工廠打工嘅朋友，收入唔多，但開支一大堆，宿舍費、生活費、電話費等，再加埋其他日常開支，每個月份薪水真係所剩無幾，若然遇着個老闆唔生性，不時剋扣工資嘅話，情況更加慘情。為咗增加收入，有唔少朋友都會偷偷哋兼職，但一定唔可以畀人知道，事關畀廠方知道咗就肯定飯碗不保。
早前我大軍就聽見一個喺深圳做廠長嘅老友福哥話，發現有工廠妹喺宿舍賣淫，而且情況十分嚴重。福哥話：「我收到消息，話有員工喺宿舍做兼職，起初都唔知係色情服務，於是暗中調查，發現宿舍內有六七個女工，竟然做啲咁嘅嘢，年紀最大嘅四十歲都有，服務老中青唔同嘅員工，初頭想炒晒佢哋，但原來炒晒仲大鑊，因為啲男工友冇錢召妓，所以至踴躍幫襯，炒晒批囡囡，啲男工友發癲都似。」咁又係呀！何必做到咁絕呢？有需要，自然有供應，斷咗條路，需要唔會話冇就冇，到時谷谷埋埋，可能仲大鑊！
撰文：大軍